Туркияда ўтган бир сутка ичида яна 26 099 кишида коронавирус тасдиқланди. Бу мамлакатда 24 ноябрдан буён қайд этилган энг юқори кўрсаткич ҳисобланади, деб хабар беради Tengrinews.
Туркия соғлиқни сақлаш вазири Фахриддин Кожанинг маълум қилишича, ўтган бир сутка давомида коронавирусга 362 535 та тест олинган бўлиб, уларнинг 26 099 таси мусбат чиққан. Шунингдек, 157 киши COVID-19 асоратлари оқибатида вафот этган. Сиёсатчи касалланиш ҳолатларининг ортишини янги «омикрон» штамми тарқалиши билан боғлаган.
«‘Омикрон’ бошқа вариантлардан кўра тезроқ тарқалмоқда. Юртимизда касалланиш ҳолатларининг ўсиши прогноз қилинмоқда», — дейди Кожа.
Аввалроқ Германияда «омикрон» штаммига чалинган одамлар орасида биринчи ўлим қайд этилганди. Борис Жонсон Британияда «омикрон» штамми билан касалланган бемор вафот этганини маълум қилганди. Шунингдек, АҚШ ва Австралияда ҳам «омикрон» билан боғлиқ биринчи ўлим кузатилган.
Жаҳон соғлиқни сақлаш ташкилоти «омикрон» дунёнинг юздан ортиқ мамлакатида аниқлангани ҳақида хабар берганди.
Изоҳ (0)