Таиланд ҳукумати мамлакат ичида коронавируснинг «омикрон» штамми билан касалланган биринчи бемор ҳақида хабар берди. Бу Жануби-Шарқий Осиё давлатида янги штаммни маҳаллий юқтириб олиш бўйича илк ҳолат, деб ёзади Reuters.
«Омикрон» штамми билан касалланган бемор аёл Таиланд фуқароси бўлиб, у вирусни асли колумбиялик бўлган турмуш ўртоғидан юқтирган. Эркак ҳам ноябрь ойида Нигерияда бўлиб қайтган.
Таиланд ҳукумати мамлакатга келган хорижликларни мажбурий карантинга олиш имкониятини кўриб чиқмоқда. Агар шундай қарор қабул қилинса, хорижлик саёҳатчилар меҳмонхоналарда карантинга олинади ҳамда улар учун COVID-19 га қарши эмланганлик сертификатини кўрсатиш мажбурий этиб белгиланади.
Ҳозирда Таиландда «омикрон» штамми билан касалланиш бўйича 63 та ҳолат қайд этилган. Улардан биттаси мамлакат ичидаги аёлда, қолганлари чет элдан ташриф буюрган кишиларда аниқланган.
Аввалроқ Нидерландия ҳукумати «омикрон» штамми тарқалиши туфайли Европа Иттифоқи мамлакатлари орасида биринчи бўлиб локдаун жорий қилганди. Шунингдек, Германия «омикрон» штамми туфайли британияликларнинг мамлакатга киришини чеклаган. Авиакомпанияларга 20 декабрь ярим тундан бошлаб Британиядан Германияга сайёҳларни ташиш тақиқланган.
Жаҳон соғлиқни сақлаш ташкилоти бош директори Тедрос Гебрейесуснинг маълум қилишича, «омикрон» варианти олдинги штаммлардан кўра тез тарқалмоқда ва ҳозирда у дунёнинг 77 мамлакатида қайд этилган.
Эслатиб ўтамиз, коронавируснинг янги «омикрон» штамми биринчи марта 11 ноябрь куни Жанубий Африка республикасида аниқланган. Британиялик олимлар янги штамм тарқалиш тезлиги туфайли аввалгиларига, жумладан, дельтага қараганда хавфлироқ бўлиши мумкинлигини таъкидлаган. ЖССТ мавжуд вакциналар ушбу штаммга қарши самарасиз бўлиши мумкин, деган шубҳалар туфайли «омикрон»ни хавфли деб тан олди.
ЖАР ҳукумати касалланиш ҳолатлари кескин ортаётгани фонида ўлим ҳолатлари «жуда кичик» ўсишни кўрсатаётганини қайд этган. «Омикрон» билан касалланганларнинг 60 тадан биттасигина шифохонага ётқизиляпти, дея маълум қилган ЖАР Соғлиқни сақлаш вазирлиги.
Изоҳ (0)