Қозоғистон президенти Қосим-Жўмарт Тўқаевнинг қарорига мувофиқ, мамлакат соғлиқни сақлаш вазири Алексей Цой лавозимидан озод этилди. Бу ҳақда Қозоғистон президенти матбуот хизматига таяниб, «ТАСС» хабар берди.
«Давлат раҳбарининг қарорига кўра, Цой Алексей Владимирович Қозоғистон соғлиқни сақлаш вазири лавозимидан озод этилди», — дейилади хабарда.
Унинг нима сабабдан ишдан олинганига аниқлик киритилмаган. 44 ёшли Цой 2020 йилнинг июнидан бошлаб Қозоғистон соғлиқни сақлаш вазири лавозимида ишлаб келаётганди (у Елжан Биртанов ўрнини эгаллаган эди). Тайинловга қадар Цой Қозоғистон президенти Тиббиёт маркази ишлар бошқармаси бошлиғи, соғлиқни сақлаш вазири ўринбосари лавозимларида фаолият юритган.
Қозоғистон президентининг матбуот котиби Берик Уали ўзининг Facebook’даги саҳифасига ёзишича, Тўқаев «собиқ соғлиқни сақлаш вазири Алексей Цойга фаол хизматлари учун, айниқса, Қозоғистонда коронавирус пандемияси тарқалишига қарши курашдаги ишларига миннатдорлик билдирган».
Соғлиқни сақлаш вазирлиги матбуот хизматининг маълум қилишича, Цой бошқа ишга ўтгани муносабати билан ўз хоҳишига кўра, лавозимидан кетган.
Эслатиб ўтамиз, Қозоғистон коронавируснинг янги «омикрон» штамми сабаб 3 декабрдан бошлаб Африканинг бир нечта мамлакати ва Гонконгдан келадиган фуқароларнинг мамлакатга киришини чеклаган. Шунингдек, COVID-19 нинг янги варианти аниқланган бошқа мамлакат фуқароларининг кириш тартибларини кучайтирган эди.
Изоҳ (0)