Коронавируснинг янги «омикрон» варианти олдинги штаммлардан кўра тез тарқалмоқда ва ҳозирда у дунёнинг 77 мамлакатида қайд этилган. Бу ҳақда Жаҳон соғлиқни сақлаш ташкилоти бош директори Тедрос Гебрейесус навбатдаги брифингда маълум қилди, деб хабар беради «РБК». Брифинг трансляцияси YouTube орқали узатилган.
«Етмиш етти мамлакат ‘омикрон’ ҳолатлари ҳақида маълум қилди. Эҳтимол, аслида у бунданда кўп давлатларда мавжуд, ҳатто ҳали аниқланмаган бўлса ҳам», — дейди ЖССТ бош директори.
Гебрейесуснинг таъкидлашича, ташкилот вирусни етарлича баҳоламаган, чунки у касаллар сонига тайёр бўлмаган соғлиқни сақлаш тизимларини қулатиши мумкин. Гебрейесуснинг эслатишича, вакцинацияланган инсонлар эмланмаганлар каби ниқоб тақиши ва ижтимоий масофаланишга риоя этиши зарур.
Аввалроқ Жаҳон соғлиқни сақлаш ташкилоти бош директори Тедрос Гебрейесус коронавируснинг янги «омикрон» штамми сабаб ҳаддан ортиқ жиддий чекловларни жорий этаётганини маълум қилганди.
Коронавируснинг янги «омикрон» штамми биринчи марта 11 ноябрь куни Жанубий Африкада топилган. Британиялик олимларнинг таъкидлашича, янги штамм тарқалиш тезлиги туфайли аввалгиларига, жумладан, дельтага қараганда хавфлироқ бўлиши мумкин. Жаҳон соғлиқни сақлаш ташкилоти мавжуд вакциналар ушбу штаммга қарши самарасиз бўлиши мумкин, деган шубҳалар туфайли «омикрон»ни хавфли деб тан олди. Ташкилот, шунингдек, илгари коронавирусни бошдан ўтказганларда «омикрон» билан қайта касалланиш эҳтимоли юқорилигини маълум қилди.
Изоҳ (0)