Вашингтон Афғонистоннинг АҚШдаги давлат заҳираларини блокдан чиқаришни режалаштирмаяпти, дея хабар берди «Afghanistan.ru».
Оқ уй матбуот котиби Жен Псаки музлатилган активлар билан боғлиқ вазиятни шарҳлар экан, АҚШ иттифоқчилар билан келишилган ҳолда бу масалани ўрганишда давом этаётганини таъкидлади, бироқ унинг сўзларига кўра, ҳозирда бу борада ҳеч қандай янгилик йўқ.
Псакининг сўзларига кўра, молиявий активларнинг ҳолати 11 сентябрь терактлари қурбонларининг оилалари томонидан қўзғатилган суд муҳокамасининг мавзусидир. Унинг қўшимча қилишича, бу жараёнларни «эътиборсиз қолдириб бўлмайди, улар камида йил охиригача, эҳтимол узоқроқ муддатга маблағларнинг ҳар қандай ҳаракатини вақтинча тўхтатиб туришга сабаб бўлади».
Шунингдек, Псакининг таъкидлашича, ушбу пуллар «Толибон»га эмас, балки афғон халқига фойда келтиришини таъминлаш учун қандай йўл тутиш борасидаги мураккаб саволлар АҚШни ҳамон ўйлантирмоқда.
Бундан ташқари, унинг айтишича, «Толибон» террорчи гуруҳ сифатида АҚШ санкциялари остида, унинг бир қатор етакчилари эса Бирлашган Миллатлар Ташкилоти Хавфсизлик Кенгашининг санкциялар рўйхатига киритилган, буларнинг барчаси улар билан молиявий ҳамкорликни мураккаблаштиради.
Эслатиб ўтамиз, Афғонистондаги иқтисодий вазиятнинг ёмонлашуви фонида «Толибон» бир неча бор Вашингтонни афғон активларини блокдан чиқаришга чақирган. Айни пайтда афғон валютаси пасайишда давом этмоқда: 13 декабрь куни Кобулда 1 доллар эвазига 123 афғони берилган.
Афғонистонда «Толибон» ҳокимиятга келгач, АҚШ ҳукумати афғон активларини, Жаҳон банки ва Халқаро валюта жамғармаси эса Афғонистон иқтисодиёти ва бошқарувини қўллаб-қувватлашга мўлжалланган маблағларни «Толибон» қўлига тушиб қолишидан ва нотўғри мақсадда ишлатилишидан қўрқиб, музлатиб қўйганди. Россия, Хитой, Покистон ва бир қатор МДҲ давлатлари АҚШ санкциялари оғир аҳволда қолган афғон халқига гуманитар ёрдам етказилишга тўсқинлик қилаётганини даъво қилиб, бу пулларни блокдан чиқаришга чақирмоқда.
Изоҳ (0)