Беларусь мухолифати етакчиси Светлана Тихановскаянинг турмуш ўртоғи Сергей Тихановский 18 йилга қамалди. У 2020 йилда сайловда иштирок этмоқчи бўлган, бироқ якунда сайловда рафиқаси қатнашган

Беларусдаги президентлик сайловларида иштирок этган ва Беларусь мухолифати етакчисига айланган Светлана Тихановскаянинг турмуш ўртоғи, блогер Сергей Тихановскийни суд 18 йиллик кучайтирилган режимдаги колонияга ҳукм қилди. Бу ҳақда «Белта» агентлигига тайниб, Meduza хабар берди.

Тихановский устидан суд жараёни Гомелдаги тергов изоляторида ёпиқ эшиклар ортида бўлиб ўтди. У билан бирга яна беш киши судланди — Тихановскийнинг «Страна для жизни» («Мамлакат ҳаёт учун») YouTube канали оператори Артём Саков, лойиҳанинг ижтимоий тармоқлардаги модератори Дмитрий Попов (ҳар бири 16 йиллик кучайтирилган режимдаги колонияга ҳукм қилинди), МозгОН YouTube канали муаллифи Владимир Сиганович ва «Беларусь головного мозга» телеграм канали муаллифи Игорь Лосик (ҳар бири 15 йиллик кучайтирилган режимдаги колонияга), шунингдек, беларуслик мухолифатчи сиёсатчи Николай Статкевич (14 йиллик кучайтирилган режимдаги колонияга ҳукм қилинди).

Бундан ташқари, судланувчилардан 2,5 миллион Беларусь рубли (994,8 минг доллар)дан ортиқ моддий зарар ундирилган.

«Страна для жизни’ ёзуви остида беларусларга дарғазаб оломоннинг ҳокимиятни қай тарзда эгаллаши ҳақида спектакль кўрсатишга уринилган. Терговда аниқланганидек, бунинг учун психологик таъсир ўтказиш усуллари, сохталаштириш ва фаолларни пора билан сотиб олишга уринишлар бўлган, кўча урушига тайёргарлик кўрилган» — дея маълум қилди Беларусь Тергов қўмитаси суд ҳукми ўқилганидан кейин.

Сергей Тихановский 2019 йилда YouTube’да «Страна для жизни» блогини очган. Унда у Беларусь ҳукуматини танқид қилар, кичик шаҳарлар аҳолиси ва мухолифат фаоллари билан интервьюларни жойлаштирар эди. Блог оммалашиб кетди, 2020 йилда эса Тихановский Беларусдаги президентлик сайловларида иштирок этмоқчилигини эълон қилди. Аммо унинг номзод сифатида рўйхатдан ўтишига рухсат берилмади. Блогернинг ўрнига рафиқаси Светлана Тихановская президентликка номзодини қўйди. Сергей унинг ташаббус гуруҳини бошқарган. 2020 йил май ойининг охирида имзо йиғиш пикети чоғида Сергей Тихановский ҳибсга олинган.

2020 йил август ойида Тихановская президентлик сайловларида мухолифатдан ягона номзод сифатида қатнашди. Беларусь Марказий сайлов комиссияси маълумотларига кўра, Тихановская 80 фоиз овоз олган Александр Лукашенкодан кейин 10 фоиз овоз билан иккинчи ўринни эгаллади. Тихановская ушбу натижани тан олмади. Сайловдан бир неча кун ўтгач, у Беларусь ҳукумати босими остида Литвага жўнаб кетди. Беларусда эса Лукашенкога қарши норозилик намойишлари бошланди ва бир неча ой давом этди.

Сергей Тихановский оммавий тартибсизликлар ва жамоат тартибини қўпол рабовишда бузувчи гуруҳ ҳаракатларини ташкиллаштиришда, «ҳокимият ва ҳуқуқни муҳофаза қилиш органлари вакилларига қарши» ижтимоий нафрат уйғотишда, шунингдек, ўша пайтда МСК раиси бўлган Лидия Ермошинага таҳдид қилишда айбланган. Тергов маълумотларига кўра, сайловдан кейинги норозиликларни қўзғатганлар — айнан Тихановский ҳамда унинг шериклари деб аталувчи шахслар бўлган.

Ушбу норозилик намойишлари давомида, 2020 йилнинг кузида Лукашенко Тихановский ва бошқа сиёсий маҳбуслар билан учрашиб, улар билан аввал ваъда қилинган Конституцияга ўзгартиришлар киритиш масаласини муҳокама қилиш учун тергов изоляторига борган. Эртаси куни йиғилиш иштирокчиларидан икки нафари тергов изоляторидан озод этилди. Улар орасида Тихановский йўқ эди — унга тўрт ой ичида биринчи марта хотини билан телефонда гаплашишга рухсат берилди. Тихановскаянинг телеграм-каналида суҳбатдан парчалар эълон қилинган, Сергей суҳбатларда Светланани «оғирроқ бўлишга» чақирган.

Турмуш ўртоғига ҳукм чиқарилишидан аввал Тихановская Сергейга 15 йилдан ортиқ қамоқ жазоси берилиши мумкинлигини тахмин қилганди.

«Аммо масала рақамларда эмас. Бир, беш, ўн бир, йигирма — бу рақамлар беларусларнинг ҳақиқатда озодликдан маҳрум йиллари бўлмаслиги зарур», — дея қўшимча қилган у.

«Унинг (Лукашенко) ушбу ‘жазо ҳукми’ ҳақида шундай фикр билдиришим мумкин. Ўзимга биргина савол бераман: бу янгиликдан сўнг нима қиламан? Мен ўзим севган ва миллионлаб беларусларнинг етакчисига айланган одамни ҳимоя қилишда давом этаман. У билан янги Беларусдаги учрашувимиз дамларини яқинлаштириш учун ўта машаққатли, эҳтимол, имконсиз ишни бажаришга ҳаракат қиламан. Мен унга табрикномалар ва болалар чизган расмларни юборишда давом этаман, вақт ўтиб учрашганимизда улардан эсдалик альбом яратамиз», — деди Тихановская.