Туркия президенти Ражаб Тоййиб Эрдўғон фуқароларни сабрли бўлишга ва ҳукуматининг янги иқтисодий моделига ишонишга чақирди. Бу ҳақда Reuters хабар берди.
Вазирлар Маҳкамаси йиғилишидан кейин нутқ сўзлаган Эрдўғон Туркияда нархларнинг ошишига маҳаллий импортчилар ва чакана савдогарларнинг «хасислиги» сабаб бўлганини, вазият тез орада барқарорлашишини айтди.
«Туркиянинг салоҳиятини олдинга силжитишимиз керак. Қаерга кетаётганимизни биламиз, халқимиздан сабрли бўлишини сўрайман. Мувозанат топиш учун энергия таъминоти ва озиқ-овқат нархларининг пасайишига ишонаман», — деди Эрдўғон.
Унинг қўшимча қилишича, ҳукумат захира йиғаётган ва товарлар нархининг ошишидан фойдаланиб қолмоқчи бўлган шахсларга «раҳм-шафқат қилмайди».
Туркия лирасининг долларга нисбатан курси рекорд даражада пасайишда давом этмоқда. Ноябрь ойида турк валютаси ўз қийматининг қарийб 40 фоизини йўқотди, йил бошидан бери эса деярли икки баравар қадрсизланди. Туркияда ставкаларни пасайтиришнинг асосий тарафдори — мамлакат президенти Ражаб Тоййиб Эрдўғон. Паст фоиз ставкаси иқтисодий ўсишни рағбатлантириши туфайли Эрдўғон уни қўллаб-қувватлайди. Туркия президенти шунингдек, бу инфляцияни ушлаб туришга ёрдам беряпти, деб ҳисоблайди, ваҳоланки бу фикр унчалик ҳам тўғри эмас. Аксинча паст фоиз ставкасининг ҳиссаси билан иқтисодиёт ва даромадларнинг ўсиши аҳолини кўпроқ маблағ сарфлашга ундайди, бизнес эса талаб ўсиб бораётган шароитда нархларни оширади.
23 ноябрь куни валюта курсининг рекорд даражада пасайиши ортидан йирик шаҳарларда юзлаб одамлар кўчаларга чиқиб, президентнинг истеъфосини талаб қилди. Мухолифатчи партиялар Эрдўғонни лаёқатсизликда айблаб, муддатидан олдин сайлов ўтказишни талаб қилмоқда. Президентнинг ўзи эса лиранинг қадрсизланишида «ташқи кучлар»ни айблаган.
Эрдўғон лира курсининг рекорд даражада тушиб кетиши фонида Туркия молия вазирини алмаштирди.
Изоҳ (0)