Apple’нинг бозор баҳоси Ўзбекистон ЯИМдан 50 баравар ортди

Apple тарихда капиталлашуви 3 триллион доллардан ортган биринчи компания бўлди, деб хабар беради Spot.

Nasdaq биржаси маълумотларига кўра, 9 декабрь куни бўлиб ўтган кимошди савдосида корпорациянинг Купертино (Калифорния)даги котировкалари 175 долларгача кўтарилган. Уларнинг энг юқори баҳоси тарихий максимум кўрсаткични янгилаган — ҳар бир акция учун 176 доллар.

Компаниянинг бозор баҳоси ҳозирда 3,026 триллион долларни ташкил этади, ўз чўққисида эса у 3,04 триллион долларга етди. Шу тарзда Apple’нинг баҳоси Ўзбекистон Ялпи ички маҳсулотидан 50 баравар ошди.

Шунингдек, 2020 йил август ойида бошқа компаниялар орасида биринчи бўлиб Apple’нинг капиталлашуви 2 триллион долларга етганди. Бир ой аввал Apple Саудия Арабистонининг давлат нефть компанияси — Saudi Aramco’ни ортда қолдириб, дунёдаги энг қиммат компанияга айланганди.

2018 йилда Apple 1 триллион долларлик маррадан ўтган. Компанияга иккинчи триллион учун тахминан икки йил, учинчи триллион учун эса бир йилдан сал кўпроқ вақт керак бўлди.

2021 йилнинг октябрь ойида Apple ўз молиявий йилининг тўртинчи чорагидаги сотувлари ва олган фойдаси ҳақида ҳисобот берди. Компания ўтган йилга нисбатан ўз даромадини 29 фоизга – 83,4 миллиард долларгача оширган, бироқ инвесторлар кутган 85,1 миллиард долларлик маррага ета олмаган.

Бунга компаниянинг асосий маҳсулоти – iPhone сотувидан олинган даромад сабаб бўлган. Бир қатор муаммолар, жумладан, чиплар етишмаслиги ва бутловчи қисмларни етказиб беришдаги кечикишлар туфайли Apple 6 миллиард доллар даромаддан қуруқ қолган.