Франция президенти Эммануэль Макроннинг фикрича, Пекин Олимпиадасига дипломатик бойкот эълон қилиш арзимаган қадам бўлади. Аввалроқ АҚШ Хитойни инсон ҳуқуқларини бузишда айблаб, қишки Олимпиада ўйинларини сиёсий бойкот қилганди. Австралия, Буюк Британия ва Канада унга қўшилган.
Макроннинг фикрича, ё Олимпиадани «бутунлай бойкот қилиш» ва унга спортчиларни юбормаслик керак, ёки «фойдали ҳаракатлар билан вазиятни ўзгартиришга уриниш» керак. «Мен дунёда бирор кимнинг: келинг, спортчиларимизни (Пекиндаги ўйинларга) жўнатмайлик деганини эшитмадим», — деб фикрини изоҳлади Франция президенти ва дипломатик бойкотни «рамзий» деб атади
Унинг аниқлик киритишича, Франция Халқаро Олимпия қўмитаси билан биргаликда спортчилар ҳуқуқларини ҳимоя қилишни кафолатловчи низом яратиш устида иш олиб боради. «Менимча, бу мавзуларни сиёсийлаштирмаслигимиз керак, айниқса арзимас ва рамзий қадамлар ташлаш билан», — деб тушунтирди Эммануэль Макрон.
Маълумот учун, дипломатик бойкот расмий делегацияларнинг Олимпиадага боришдан бош тортишини англатади. Ушбу чекловлар спортчиларга таъсир қилмайди
6 декабрь куни АҚШ, 8 декабрь куни Австралия Олимпиада ўйинларига дипломатик бойкот эълон қилганди. Ушбу давлатлар ҳукумати ўз ҳаракатларини Хитойнинг Шинжон автоном ҳудудидаги уйғурларга нисбатан таъқиблари билан боғлаган. Уларнинг ортидан Британия ҳам спорт бойкотини эълон қилди.
Халқаро Олимпиада қўмитаси АҚШнинг қарорини «ҳурмат қилишини» билдирди. Хитойнинг АҚШдаги элчихонаси эса Вашингтон қарорини «сиёсий манипуляция» деб атади ва Америка сиёсатчиларига ҳеч қандай таклиф берилмаганини айтди.
XXIV қишки Олимпиада ўйинлари Пекинда 2022 йилнинг 4—20 февраль кунлари бўлиб ўтади. 4—13 март кунлари Хитой пойтахти Паралимпия ўйинларига мезбонлик қилади.
Изоҳ (0)