АҚШ ядровий келишув бўйича музокаралар муваффақиятсизликка учрайдиган бўлса, Эронга қарши чора кўришга ваъда берди

Агар яқин келажакда ядровий келишув бўйича музокаралар муваффақиятсизликка учраса, АҚШ Эроннинг даромад манбаларини чеклаш чораларини кўради. Бу ҳақда Оқ уй матбуот котиби Жен Псакининг баёнотига таяниб, «Коммерсантъ» хабар берди.

Брифинг чоғида АҚШ Оқ уйининг вакили «ядровий инқироздан қочишнинг энг яхши усули» дипломатия эканини айтди. «Аммо бу ёндашув муваффақиятсизликка учраган тақдирда, қўллаш учун Жо Байден АҚШ маъмуриятидан бошқа чоралар тайёрлашни сўради», — деди Псаки хоним.

«Агар дипломатия яқин кунларда зарур йўлга қайтишга ёрдам бермаса ва Эрон ядровий дастурининг ривожланиши жадаллашишда давом этса, Эроннинг даромад келтирувчи тармоқларини (иқтисодини) янада чеклаш учун қўшимча чоралар кўришдан бошқа чорамиз қолмайди», — деди матбуот котиби.

Янги санкциялар айнан қайси соҳаларга киритилиши мумкинлиги ҳақидаги саволга Псаки жавоб бермади.

Ушбу масалада фикр билдирган Россия ташқи ишлар вазири ўринбосари Сергей Рябковнинг айтишича, ядровий келишув бўйича Қўшма ҳаракатлар режаси қачон тикланиши ҳозирча номаълум. Унинг сўзларига кўра, томонлар қачон келишувга эриша олишига «яқин тушунча ҳам мавжуд эмас».

Дипломат, шунингдек, Эронга қарши санкцияларнинг кучайтирилиши АҚШ учун «ўз оёғига ўқ узиш» бўлади, деган фикрда. «Тушунишимча, америкаликлар уларнинг мулоқот ва босим уйғунлигидан иборат сиёсати ҳамма жойда, уларга мос келадиган барча давлатлар билан муносабатларда ўз самарасини бераётганига қаттиқ ишонади. Аммо бу улар ўйлагандай эмас», — деди Рябков.

Россия Ташқи ишлар вазирлигининг расмий баёнотида айтилишича, 9 декабрь куни Ядро дастури бўйича музокараларнинг барча иштирокчилари ядровий битимни тиклаш учун барча саъй-ҳаракатларни амалга ошириш ниятини тасдиқлаган. «Учрашув якунлари бўйича, жумладан, санкциялар ва ядровий масалалар бўйича ишчи гуруҳлар доирасида экспертлар даражасида интенсив ҳамкорликни давом эттиришга қарор қилинди», — дея қўшимча қилди вазирлик.

АҚШ илгари ҳам агар Эрон ядро дастурига дипломатия йўли билан қайтмаса, бошқа чоралар кўриши мумкинлигидан огоҳлантирган эди.

Аввалроқ Эрон ядро дастури иштирокчиларига ядровий мажбуриятлар ва АҚШ санкцияларини бекор қилиш юзасидан ўз таклифларни топширгани хабар қилинган.