Англия «омикрон» штамми тарқалаётгани муносабати билан коронавирусга қарши курашнинг «Б режаси»га ўтади. Бу ҳақда Буюк Британия бош вазири Борис Жонсон 8 декабрь куни эълон қилди.
Мамлакатда 10 декабрдан аксарият жамоат жойларида, жумладан, кинотеатрлар, театрлар ва бошқа маданият муассасаларида ниқоблардан фойдаланиш мажбурий этилади. Ушбу қоида хизмат кўрсатиш муассасаларига ташриф буюрувчилар ёки спорт билан шуғулланувчиларга тааллуқли бўлмайди.
Англия аҳолисига 13 декабрдан уйдан ишлаш тавсия этилди. 15 декабрдан бошлаб тунги клублар, концертлар ва кўплаб оммавий тадбирларга ташриф буюриш учун ковид-паспорт талаб қилинади. Расмийлар, шунингдек, касаллар билан алоқада бўлганларни уй карантинига юбориш ўрнига, улардан ҳар куни коронавирусга тест олишни режалаштирмоқда.
Ҳукумат ушбу чора-тадбирлар Буюк Британияда «омикрон» вариантининг тарқалишини секинлаштиришига умид қилмоқда. Буюк Британия Соғлиқни сақлаш вазирлиги раҳбари Сажид Жавиднинг маълум қилишича, 8 декабрь ҳолатига кўра, Британияда «омикрон» штаммига чалиниш бўйича 568 та ҳолат тасдиқланган, янги касалланиш ҳолатларининг сони ҳар икки ярим-уч кунда икки баравар кўпаймоқда.
Британияда «омикрон» штамми туфайли 7 декабрдан мамлакатга кириш тартиби кучайтирилган эди. Унга кўра, мамлакатга кирувчи 12 ёшдан каттанинг барчаси ПЗР ёки LFD-тестининг(иммунохроматографик таҳлил усули билан ўтказилади) салбий натижасини тақдим этиши керак.
Коронавируснинг янги «омикрон» штамми биринчи марта 11 ноябрь куни Жанубий Африкада топилган. Британиялик олимларнинг таъкидлашича, янги штамм тарқалиш тезлиги туфайли аввалгиларига, жумладан, дельтага қараганда хавфлироқ бўлиши мумкин. Жаҳон соғлиқни сақлаш ташкилоти мавжуд вакциналар ушбу штаммга қарши самарасиз бўлиши мумкин, деган шубҳалар туфайли «омикрон»ни хавфли деб тан олди. Ташкилот, шунингдек, илгари коронавирусни бошдан ўтказганларда «омикрон» билан қайта касалланиш эҳтимоли юқорилигини маълум қилди.
Аввалроқ Гонконг университети сайтида «омикрон» штаммининг электрон микроскопдан олинган тасвири чоп этилганди.
Изоҳ (0)