Buyuk Britaniyada “omikron” shtammi tufayli mamlakatga kirish tartibi kuchaytirildi

Buyuk Britaniyada 7-dekabr kuni ertalab soat 4:00 dan boshlab mamlakatga kiruvchi 12 yoshdan kattaning barchasi PZR yoki LFD-testining(immunoxromatografik tahlil usuli bilan o‘tkaziladi) salbiy natijasini taqdim etishi kerak. Bu haqda Britaniya hukumatiga tayanib, “RBK” xabar berdi. Testlar Britaniyaga jo‘nab ketishdan oldin o‘tkazilgan bo‘lishi kerak.

Shuningdek, 6-dekabrdan boshlab Nigeriya sayohat uchun “qizil ro‘yxat”dagi mamlakatlar qatoriga kiritiladi. Ya’ni so‘nggi o‘n kun ichida Nigeriyada bo‘lgan kishilarga Britaniyaga kirish taqiqlanadi. Taqiq Buyuk Britaniya va Irlandiya fuqarolariga taalluqli emas, dedi qirollik sog‘liqni saqlash vaziri Sajid Jovid Twitter’da. Britaniyaliklar va irlandlar mamlakatga qaytishi mumkin, ammo keyin belgilangan joyda karantindan o‘tishi zarur.

Buyuk Britaniya bosh vaziri Boris Jonsonning so‘zlariga ko‘ra, olimlar yangi “omikron” shtammining tarqalish tezligi va vaksinalarning unga qarshi samaradorligini aniqlagunga qadar, Britaniyada ushbu shtamm tarqalishini sekinlashtirish uchun yangi cheklovlar amalda bo‘lishi zarur. Britaniya Sog‘liqni saqlash xavfsizligi agentligi ma’lumotlariga ko‘ra, mamlakatda “omikron” shtammiga chalinish bo‘yicha jami 160 ta holat tasdiqlangan.

Koronavirusning yangi “omikron” shtammi birinchi marta 11-noyabr kuni Janubiy Afrikada topilgan. Britaniyalik olimlarning ta’kidlashicha, yangi shtamm tarqalish tezligi tufayli avvalgilariga, jumladan deltaga qaraganda xavfliroq bo‘lishi mumkin. Jahon sog‘liqni saqlash tashkiloti mavjud vaksinalar ushbu shtammga qarshi samarasiz bo‘lishi mumkin, degan shubhalar tufayli “omikron”ni xavfli deb tan oldi. Tashkilot, shuningdek, ilgari koronavirusni boshdan o‘tkazganlarda “omikron” bilan qayta kasallanish ehtimoli yuqoriligini ma’lum qildi.

Keyinroq Birlashgan Millatlar Tashkiloti yangi shtamm tufayli mamlakatlararo harakatlanishga qo‘yilayotgan taqiqlarni samarasiz va adolatsiz deb atadi. “Virus haqiqatan ham chegara bilmasligini hisobga olsak, biror mamlakat yoki mintaqani ajratib qo‘yuvchi sayohat cheklovlari adolatsiz, repressiv va samarasizdir”, — dedi BMT Bosh kotibi Antonio Guterish.

29-noyabr kuni JSST dunyoda “omikron” shtammidan o‘lim holatlari kuzatilmagani haqidagi ma’lumotlarni e’lon qildi.