Буюк Британия Хитой пойтахти Пекинда 2022 йилнинг февралида бўлиб ўтадиган Олимпиада ўйинларига дипломатик бойкот эълон қилди. Бу ҳақда мамлакат бош вазири Борис Жонсонга таяниб, Meduza хабар берди.
Жонсоннинг сўзларига кўра, на Британия ҳукумати вазирлари, на бирорта расмий шахс Олимпиада ўйинларга боради. Шу билан бирга, бош вазир Британия ҳукумати спорт бойкотини эълон қилишга қарши эканини, чунки бу «мантиққа тўғри келмаслигини» таъкидлади.
Маълумот учун, дипломатик бойкот расмий делегацияларнинг Олимпиадага боришдан бош тортишини англатади. Ушбу чекловлар спортчиларга таъсир қилмайди.
6 декабрь куни АҚШ, 8 декабрь куни Австралия Олимпиада ўйинларига дипломатик бойкот эълон қилганди. Ушбу давлатлар ҳукумати ўз ҳаракатларини Хитойнинг Шинжон автоном ҳудудидаги уйғурларга нисбатан таъқиблари билан боғлаган.
«Байден маъмурияти 2022 йилда Пекинда бўлиб ўтадиган қишки Олимпиада ва Паралимпия ўйинларига дипломатик ёки расмий вакилларини юбормайди», — деди Оқ уй матбуот котиби Жен Псаки ва спортчиларга чекловлар қўйилмаслигини таъкидлади.
Бойкот эълон қилиш қарори Вашингтон наздида Хитой инсон ҳуқуқларини поймол қилаётгани, жумладан, Шинжондаги уйғурларга қарши геноцидни давом эттираётгани учун қабул қилинди, дейилади Оқ уй баёнотида.
Псакининг фикрича, ҳозирги вазият 1980 йиллардаги воқеаларни такрорлашдан иборат эмас. Ўшанда АҚШ ва бошқа ўнлаб давлатлар, жумладан, Хитой ҳам Совет қўшинларининг Афғонистонга киритилиши сабабли Москвадаги ёзги Олимпиада ўйинларига бутунлай бойкот эълон қилганди.
Халқаро Олимпиада қўмитаси АҚШнинг қарорини «ҳурмат қилишини» билдирди. Хитойнинг АҚШдаги элчихонаси эса Вашингтон қарорини «сиёсий манипуляция» деб атади.
«Америка сиёсатчиларига ҳеч қандай таклиф берилмаган, шунинг учун бу «дипломатик бойкот» йўқ жойдан пайдо бўлган. Бундай баланпарвоз ҳаракат шунчаки сиёсий манипуляция ва Олимпия Хартияси руҳини обдон туширишдир», — деди Хитой элчихонаси вакили.
Кейинроқ Австралия бош вазир Скотт Моррисон мамлакат АҚШнинг дипломатик бойкотига қўшилишини маълум қилди.
Унинг сўзларига кўра, сўнгги йилларда Австралиянинг Хитой билан икки томонлама муносабатлари сезиларли даражада ёмонлашган. Бунга сабаблар қаторида Моррисон Шинжон-Уйғур автоном ҳудудида инсон ҳуқуқлари бузилиши давом этаётгани, шунингдек, ХХР Австралиянинг мудофаа режаларига, хусусан, ядровий сувости кемалари билан қуролланиш ниятига танқидий муносабатда эканини тилга олган.
XXIV қишки Олимпиада ўйинлари Пекинда 2022 йилнинг 4—20 февраль кунлари бўлиб ўтади. 4—13 март кунлари Хитой пойтахти Паралимпия ўйинларига мезбонлик қилади.
Мавзуга доир:
Изоҳ (0)