Швейцария парламенти ташқи ишлар вазири Иняцио Кассисни мамлакатнинг янги президенти этиб сайлади. Бу ҳақда Швейцария ТИВ сайтида хабар берилган.
2022 йилнинг 1 январидан Кассис амалдаги президент Ги Пармеленднинг ўрнини эгаллайди.
Швейцария президенти давлат раҳбари ҳисобланмайди, мамлакатни коллектив равишда бутун Федерал Кенгаш бошқаради. Бироқ унинг овози Федерал Кенгашда долзарб масалаларни муҳокама қилишда ҳал қилувчи аҳамиятга эга. «Тенглар орасида биринчи» сифатида президент кенгашнинг қолган аъзоларига кўрсатма бериш ҳуқуқига эга эмас, у ўз департаментини бошқаришда давом этади. Швейцария президенти парламент томонидан Федерал Кенгаш аъзолари орасидан бир йил муддатга сайланади ва асосан вакиллик функциялари билан шуғулланади.
Анъанага кўра, лавозим бошқарув кенгаши аъзолари ўртасида «айлантирилади», ўтган йилги вице-президент бу йил президентликка сайланади. Шу билан бирга, президент иккинчи муддатга қайта сайланиши мумкин эмас: муддати тугагач, у президентликка тайинланишидан олдин ўзи бошқарган вазирликка қайтади.
Иняцио Кассис маълумоти бўйича шифокор бўлиб, Сюрих университетида тиббиёт факультетида таҳсил олган, уни 1987 йилда тугатган. У Швейцария Миллий Кенгаши таркибига кирган ва Швейцария Тиббиёт ассоциацияси вице-президенти бўлган. Кассис 2017 йилдан мамлакат Ташқи ишлар вазирлигини бошқарган.
Аввалроқ Германия Социал-демократик партияси раҳбари Олаф Шольц расман Германиянинг янги канцлери этиб сайланганди. У ушбу лавозимда Германия ҳукуматини 16 йил бошқарган Ангела Меркелнинг ўрнини эгаллади.
Изоҳ (0)