NYT: Роман Протасевич кетаётган самолётни Минскка фавқулодда қўндирган диспетчер буни Беларусь махсус хизмати томонидан уюштирилган операция деб айтди

Мухолифатчи журналист, Nexta Telegram каналининг собиқ бош муҳаррири Роман Протасевич кетаётган Ryanair самолётини Минскка фавқулодда қўндирган «Белаэронавигация» диспетчери Олег Галегов ёзда Беларусдан Польшага қочиб кетган. Бу ҳақда The New York Times газетаси Европа расмий тузилмаларидаги манбаларга ва Польша хавфсизлик хизмати вакили Станислав Заринга таяниб хабар берди.

Аввалроқ Беларуснинг «Наша Нива» нашри Галеговнинг ҳамкасбларига таяниб, у Беларусни тарк этгани ҳақида хабар берганди. Ўшанда нашр суҳбатдошларидан бири келиб чиқиши грузин бўлган ва улғайган чоғида Беларусга кўчиб ўтган Галегов Грузияга қайтган бўлиши мумкинлигини айтган.

The New York Times газетасининг ёзишича, 2021 йилнинг ёзида Галегов Беларусь—Польша чегарасини ноқонуний кесиб ўтган. Дастлаб у АҚШнинг Варшавадаги элчихонаси билан боғланган, аммо у ердан Польша ҳукуматига жўнатилган.

Европа махсус хизматларининг исми ошкор этилмаган вакиллари NYT’га айтишича, Польшада диспетчер воқеа тафсилотларини ошкор қилиб, гувоҳлик берган. Галеговнинг сўзларига кўра, лайнер бортида портлаш хавфи мавжудлиги атай ўйланган ёлғон эди, самолётнинг фавқулодда қўниши эса Протасевични қўлга олиш учун Беларусь махсус хизмати (КГБ) томонидан уюштирилган операция бўлган.

Польша миллий хавфсизлик департаменти директори Станислав Зариннинг айтишича, Ryanair ҳодисасини тергов қилаётган польшалик расмийлар «Минскдаги диспетчерлик минорасида юз берган воқеаларнинг бевосита гувоҳи»дан маълумот олишга муваффақ бўлган. Зариннинг сўзларига кўра, диспетчерлик хонасида Беларусь КГБ офицери бўлган ва «ҳал қилувчи паллада» у авиадиспетчерлик хизматини назоратга олган. Шу билан бирга, офицер телефонда ким биландир мунтазам гаплашиб, самолёт билан боғлиқ вазият ҳақида айтиб турган, дея қўшимча қилди Зарин.

NYT хабарига кўра, диспетчер Польшани аллақачон тарк этган, у ҳозир қаерда экани номаълум.

Эслатиб ўтамиз, 23 май куни Беларусь ҳукумати Ryanair авиакомпаниясининг Афинадан Вильнюсга учаётган самолётини бортда бомба бор деган хабар билан шошилинч равишда Минскка қўнишга мажбур қилганди. Самолёт йўловчилари орасида Роман Протасевич ҳам бор эди. Протасевич ва унинг севгилиси — Россия фуқароси Софя Сапега аэропортда қўлга олинган.

Беларусь ҳукумати Протасевични 2020 йилда Александр Лукашенкога қарши намойишларда иштирок этгани учун тартибсизликлар уюштириш, жамоат тартибини қўпол равишда бузиш ва ижтимоий адоват қўзғатишда айбламоқда. Сапега Беларусь хавфсизлик кучларининг шахсий маълумотлари эълон қилинган «Беларусь қора китоби» Telegram каналини бошқаришда айбланган.

Ryanair самолётининг мажбуран қўндирилиши муносабати билан Европа Иттифоқи Беларусга қарши соҳага оид санкциялар жорий қилди ва Беларуснинг «Belavia» авиакомпанияси учун ҳаво ҳудудини ёпди. Ҳибсга олинганидан кейин Протасевич Беларусь давлат матбуотига бир қатор интервьюлар бериб, уларда мухолифатни қоралади.