Бирлашган Миллатлар Ташкилоти бош котиби Антониу Гутерришнинг коронавирусга топширган тести ижобий чиқди ва у ўзини яккалаш режимига ўтди. Бу ҳақда 8 декабрь куни AFP хабар берди.
Агентлик маълумотларига кўра, БМТнинг 72 ёшли раҳбари COVID-19 ни аввалроқ инфекция ташхиси қўйилган бошқа ходимдан юқтирган. Шу билан бирга бош котиб яқинда коронавирусга қарши вакцинанинг учинчи — бустер дозасини олганди.
Қайд этилишича, Гутерриш яқин кунларда Нью-Йоркнинг Манхэттенида бўлиб ўтадиган БМТ Матбуот ассоциациясининг йиллик тадбирида ҳамда БМТ Хавфсизлик кенгашининг терроризм ва иқлим ўзгариши бўйича йиғилишида иштирок этишни режалаштирган эди.
Бироқ у мазкур учрашувларни бекор қилишга ва ўзини яккалашга мажбур бўлган.
Нашрнинг маълум қилишича, БМТ раҳбарининг матбуот котиби Стефан Дюжаррик бош котибнинг соғлиғи ҳақида изоҳ беришдан бош тортган.
Аввалроқ Антониу Гутерриш коронавируснинг «омикрон» штамми туфайли чегаралар ёпилаётганини танқид қилганди. Бош котибнинг таъкидлашича, маълум бир мамлакат ёки минтақани изоляция қилувчи чекловлар «нафақат ўта адолатсиз ва оғир, балки самарасиз ҳамдир».
Шунингдек, Антониу Гутерриш 2030 йилгача Ер аҳолисининг барчасини интернет билан таъминлашга чақирган. «COVID-19 пандемияси интернетнинг ҳаётни ўзгартира олиш хусусиятини яққол кўрсатди. Рақамли технология миллионлаб одамларга онлайн режимда хавфсиз ишлаш, ўқиш ва мулоқот қилиш имконини бериб, ҳаётни сақлаб қолди», — дея таъкидлаган бош котиб.
Изоҳ (0)