Индонезиянинг Ява оролидаги Семеру вулқонининг отилиши оқибатида ҳалок бўлганлар сони 34 кишига етди. Бу ҳақда 7 декабрь куни Индонезия табиий офатлар оқибатларини бартараф этиш миллий агентлигига таяниб, «Korrespondent.net» хабар берди.
Агентлик матбуот котиби Абдул Мухарийнинг сўзларига кўра, 17 киши бедарак йўқолган деб ҳисобланмоқда. Уларни қидиришда итлардан фойдаланилмоқда. Хавфли ҳудуддан қарийб 3700 киши эвакуация қилинган.
Расмийлар ҳавонинг ифлосланиши сабабли Семеру вулқонига 5 километрдан ортиқ яқин бормасликни тавсия қилди. Аввалроқ ҳудудда учта кичик вулқон отилиши қайд этилган, уларнинг ҳар бири тахминан бир километр баландликка кул отган.
4 декабрь куни Ява оролидаги Семеру вулқони отилишни бошлади. Семеру — Индонезиядаги 130 га яқин фаол вулқонлардан бири. Ундан отилган кул устуни 15 километр баландликка кўтарилди, натижада авиакомпаниялар ўз йўналишини ўзгартиришга мажбур бўлди. Вулқон яқинида жойлашган 11 қишлоқ, жумладан, Сумбер Вулух қалин кул ва вулқон чанги остида қолди. Ҳудуддаги аччиқ тутун, электр энергияси йўқлиги ва тропик ёмғир қидирув-қутқарув ишларига тўсқинлик қилмоқда.
Изоҳ (0)