Бирлашган Араб Амирликларида (БАА) янги иш ҳафтаси жорий этилади. Бу ҳақда БАА ахборот агентлигига таяниб, Tengrinews хабар берди.
«Ҳафталик ишнинг янги системаси тасдиқланди. Унга кўра, ҳафтада тўрт ярим кун — иш куни, шанба ва якшанба — дам олиш кунлари, жума – соат 12:00 гача давом этадиган ярим иш куни бўлиши назарда тутилган», — деб ёзади агентлик.
БААда амалдаги иш ҳафтаси бўйича жума ва шанба кунлари дам олиш, якшанба иш куни ҳисобланади.
БАА ҳукумати масжидларда жума хутбаси ва намози бир вақтда ўқилиши ҳамда маҳаллий вақт билан соат 13:15 да (Тошкент вақти билан 12:15) бошланиши ҳақида эълон қилди. Одатда эса жума намози соат 11:00 да бошланиб, 13:00 да тугайди.
Шу билан бирга, давлат муассасалари ходимлари жума куни масофадан туриб ишлаши мумкин.
Ўзгаришлар 2022 йил январь ойидан кучга киради.
Аввалроқ Исландияда иш ҳафтасини қисқартириш бўйича дунёдаги энг йирик тажриба муваффақиятли ўтгани хабар қилинганди. Муваффақиятли синовлардан сўнг Исландия касаба уюшмалари мамлакат бўйлаб ўн минглаб одамлар учун иш ҳафталарини қисқартирди. Ҳозирда Исландияда меҳнатга лаёқатли аҳолининг 86 фоизи қисқароқ иш ҳафтасига ўтган ёки иш вақтини қисқартириш ҳуқуқини олган.
Изоҳ (0)