Birlashgan Millatlar Tashkiloti bosh kotibi Antoniu Guterrishning koronavirusga topshirgan testi ijobiy chiqdi va u o‘zini yakkalash rejimiga o‘tdi. Bu haqda 8-dekabr kuni AFP xabar berdi.
Agentlik ma’lumotlariga ko‘ra, BMTning 72 yoshli rahbari COVID-19 ni avvalroq infeksiya tashxisi qo‘yilgan boshqa xodimdan yuqtirgan. Shu bilan birga bosh kotib yaqinda koronavirusga qarshi vaksinaning uchinchi — buster dozasini olgandi.
Qayd etilishicha, Guterrish yaqin kunlarda Nyu-Yorkning Manxettenida bo‘lib o‘tadigan BMT Matbuot assotsiatsiyasining yillik tadbirida hamda BMT Xavfsizlik kengashining terrorizm va iqlim o‘zgarishi bo‘yicha yig‘ilishida ishtirok etishni rejalashtirgan edi.
Biroq u mazkur uchrashuvlarni bekor qilishga va o‘zini yakkalashga majbur bo‘lgan.
Nashrning ma’lum qilishicha, BMT rahbarining matbuot kotibi Stefan Dyujarrik bosh kotibning sog‘lig‘i haqida izoh berishdan bosh tortgan.
Avvalroq Antoniu Guterrish koronavirusning “omikron” shtammi tufayli chegaralar yopilayotganini tanqid qilgandi. Bosh kotibning ta’kidlashicha, ma’lum bir mamlakat yoki mintaqani izolyatsiya qiluvchi cheklovlar “nafaqat o‘ta adolatsiz va og‘ir, balki samarasiz hamdir”.
Shuningdek, Antoniu Guterrish 2030-yilgacha Yer aholisining barchasini internet bilan ta’minlashga chaqirgan. “COVID-19 pandemiyasi internetning hayotni o‘zgartira olish xususiyatini yaqqol ko‘rsatdi. Raqamli texnologiya millionlab odamlarga onlayn rejimda xavfsiz ishlash, o‘qish va muloqot qilish imkonini berib, hayotni saqlab qoldi”, — deya ta’kidlagan bosh kotib.
Izoh (0)