Бирлашган Миллатлар Ташкилоти бош котиби Антониу Гутерриш 2030 йилгача Ер аҳолисининг барчасини интернет билан таъминлашга чақирди. Бу ҳақда «РИА Новости» хабар берди.
«COVID-19 пандемияси интернетнинг ҳаётни ўзгартира олиш хусусиятини яққол кўрсатди. Рақамли технология миллионлаб одамларга онлайн режимда хавфсиз ишлаш, ўқиш ва мулоқот қилиш имконини бериб, ҳаётни сақлаб қолди. Аммо пандемия рақамли тафовутни ва технологиянинг салбий томонини ҳам оширди: нотўғри маълумотларнинг яшиндек тарқалиши, инсон хатти-ҳаракатларини манипуляция қилиш ва ҳоказо», — деди Гутерриш Польшанинг Катовице шаҳрида бўлиб ўтган БМТ рақамли саммитидаги нутқида.
«Ҳамкорликни мустаҳкамлаш орқалигина бу муаммоларни биргаликда ҳал қилишимиз мумкин», — деди бош котиб. Унинг қўшимча қилишича, «инсон ҳуқуқлари ва асосий эркинликларини ҳимоя қилиш бўйича аниқ қоидаларни ўрнатиш, маълумотлар устидан назоратни тиклаш, нотўғри талқин қилинган ва нафрат уйғотувчи хабарларга қарши курашиш, шунингдек, 2030 йилгача бутун аҳолини интернетга улаш орқали ҳамкорликни мустаҳкамлаш кўзда тутилмоқда».
Аввалроқ Антониу Гутерриш коронавируснинг «омикрон» штамми туфайли чегаралар ёпилаётганини танқид қилганди. Бош котибнинг таъкидлашича, маълум бир мамлакат ёки минтақани изоляция қилувчи чекловлар «нафақат ўта адолатсиз ва оғир, балки самарасиз ҳамдир».
Ноябрь охирида БМТ бош котиби Эфиопиядаги жанговар ҳаракатларни зудлик билан тўхтатишга чақирган.
Изоҳ (0)