BMT bosh kotibi Efiopiyadagi jangovar harakatlarni zudlik bilan to‘xtatishga chaqirdi

Birlashgan Millatlar Tashkiloti (BMT) bosh kotibi Antoniu Guterrish Efiopiyadagi jangovar harakatlarni zudlik bilan to‘xtatishga chaqirdi, deb yozadi Reuters.

Guterrish Kolumbiyadagi hukumat va demobilizatsiya qilingan Inqilobiy qurolli kuchlar (FARC) o‘rtasida tuzilgan tinchlik kelishuvining besh yilligi munosabati bilan u yerga tashrif buyurgandi. Tashrif davomida u Efiopiyadagi vaziyatga to‘xtalib o‘tdi.

“Kolumbiyadagi tinchlik jarayoni bugun meni Efiopiyadagi qarama-qarshi tomonlarni so‘zsiz va zudlik bilan o‘t ochishni to‘xtatishga undash uchun ilhomlantirdi”, — dedi Guterrish Kolumbiya prezidenti Ivan Duke bilan qo‘shma nutqida.

BMT bosh kotibining so‘zlariga ko‘ra, Efiopiyada harbiy harakatlar to‘xtatilishi efiopiyaliklar o‘rtasida muloqot o‘rnatish imkonini beradi, bu esa, o‘z navbatida, mamlakatga mintaqa barqarorligi uchun yana o‘z hissasini qo‘shishga imkon beradi.

“Men Efiopiya rahbarlari Kolumbiyadan o‘rnak olishini juda istardim”, — deya qo‘shimcha qildi Guterrish.

Efiopiyada qurolli to‘qnashuvlar 2020-yil 4-noyabr kuni hukumat va mamlakatdagi hukmron Tigray so‘l partiyasining “Tigrayni ozod qilish xalq fronti” (TPLF) o‘rtasida boshlangan. Bunga Efiopiya hukumatining TPLF’ni mamlakat qurolli kuchlari harbiy bazasiga hujum uyushtirganlikda ayblashi sabab bo‘lgan.

BMT ma’lumotlariga ko‘ra, to‘qnashuvlar natijasida o‘n minglab odam Efiopiyadan Sudanga qochib ketgan. Tashkilot Efiopiyaning Tigray hududi aholisi so‘nggi o‘n yil ichidagi eng yomon ocharchilik yoqasida ekani haqida bir necha bor xabar bergan.

Avvalroq Efiopiya bosh vaziri Abiy Ahmed TPLF isyonchilariga qarshi kurashda qo‘shinlarni boshqarishni o‘z zimmasiga olayotgani xabar qilingandi. Abiy Ahmed hokimiyatga 2018-yilda kelgan. Oradan bir yil o‘tgach, u Eritreya bilan mojaroni tugatishga qaratgan sa’y-harakatlari uchun tinchlik bo‘yicha Nobel mukofotini qo‘lga kiritgan.

Noyabr boshida Efiopiyada olti oylik muddatga favqulodda holat e’lon qilingan.