АОКАда Санитария-эпидемиологик осойишталик ва жамоат саломатлиги хизмати, Республика ОИТСга қарши кураш маркази мутасаддилари иштирокида матбуот анжумани ўтказилди. Унда Республикада ОИТСга чалинган болалар ҳақида маълумот берилди.
Республика ОИТСга қарши кураш маркази директори ўринбосари Гулифор Нормуродованинг қайд этишича, 10 йиллик маълумотларга кўра, ушбу касалликка чалинган болалар йилдан йилга камайиб бормоқда.
«2020 йил давомида 150 нафарга яқин болада ОИТС касаллиги аниқланди. Йил бўйича деганда буни умумий тушуниш керак, чунки бу касаллик бугун юқиб, эртага аниқланмайди, балки 10-20 йил аввал юққан бўлиши мумкин. Лекин аниқланган вақти 2020 йилга тўғри келади», – Гулифор Нормуродова.
Санитария-эпидемиологик осойишталик ва жамоат саломатлиги хизмати бошлиғи ўринбосари Ботир Қурбоновнинг таъкидлашича, 2020 йилда қайд этилган касалликни қарийб 10 фоизини болалар ўртасида касаллик ташкил этган.
«Болалар ўртасидаги касалланиш ҳолатлари ҳудудлар кесимида ҳам катталардаги сингари аҳоли гавжум бўлган ёки аҳолининг яшаш тарзи бошқа марказий шаҳарларга нисбатан серқатновлиги ва ривожланиб боришига қараб кўпроқ қайд этилади.
Хусусан, Тошкент шаҳри, Андижон, Самарқанд ва Фарғона вилоятида бошқа ҳудудларга нисбатан кўпроқ аниқланган. Қайсики вилоятда кўп касаллик қайд этилган бўлса, параллел равишда худди шу вилоятда болалар ўртасида ҳам кўпроқ касаллик қайд этилган», – дейди Ботир Қурбонов.
Изоҳ (0)