Ҳудудларда 1 миллиондан ортиқ аҳоли учун «Янги Ўзбекистон» массивларини қуриш лойиҳаси «мамлакат фаровонлигини ошириш, яшаш шароитларини яхшилаш борасидаги энг муҳим ислоҳотлардан биридир». Бу ҳақда президент Шавкат Мирзиёев 30 ноябрь куни янги массивлар қурилишига доир тақдимот билан таниши вақтида айтиб ўтди, дея хабар бермоқда «Ўзбекистон 24» телеканали.
«Дастур асосида 2022 йилда 22 та массивда 34 та мактаб қурилади, 43 та боғча, 21 та тиббиёт муассаси қурилиши керак. Бу ҳам ҳамма шароитларни яратиш учун лойиҳага кирган. Энг катта мақсадим — массивларда кичик саноат зоналари, тадбиркорлик субъектларини ташкил этиш орқали камида 50 минг иш ўрни яратишимиз зарур», — деган президент. Айни вақтда, Шавкат Мирзиёев илк намунавий массив Фарғонанинг Боғдод туманида, «имкони йўқ жойда» амалга оширилганини қайд этиб ўтган.
Президент ушбу массивларда камида 1000 та хонадон бўлиши мақсадга мувофиқлигини таъкидлаган. «Ўзбекистон 24» репортажида Наманганнинг Чуст тумани «Гулзор» маҳалласида бунёд этилиши режалаштирилаётган массивда уч йилда жами 1180 та хонадон (2021 йилда 500 та хонадонли 22 та, 2022 йилда 300 та хонадонли 15 та, 2023 йилда 380 та хонадонли яна 15 та кўп қаватли уй) фойдаланишга топширилиши режалаштирилганини кўриш мумкин.
Давлат раҳбари янги массивлар аҳолиси учун улар яқинидан 15 гектардан қишлоқ хўжалиги ерларини ажратиш зарурлигини айтган. Шавкат Мирзиёев ушбу массивларни қуришда ҳар бир бино ва иншоотга энергия тежамкор ускуналарни жойлаштириш, қурилиш материалларини ишлаб чиқаришда маҳаллий хом ашёлардан кенг фойдаланиш, шу орқали нархларни арзонлаштириш, аҳоли учун зарур барча қулайликларни яратиш юзасидан топшириқ ва кўрсатмалар берган.
Қурилиш вазири биринчи ўринбосари Давронжон Одилов «Ўзбекистон 24» телеканалига берган интервьюсида, жумладан, шундай деди: «Президент бу лойиҳаларда асосан эътибор қаратилиши керак бўлган нуқталар қилиб, массивларни танлашда вилоятларнинг энг узоқ, бугунги кунда уй-жойга эҳтиёжи баланд, эътибордан четда қолган, инфратузилма объектлари етиб бормаган, коммуникация тармоқлари билан тўла таъминланмаган ҳудудларини танлаб, ўша ҳудудларни ободлантиришга, инфратузилма, тараққиёт олиб киришга қаратди».
Президент матбуот хизматининг 30 ноябрдаги ахборотида «Янги Ўзбекистон» массивларини қуриш дастурига бағишланган ноябрь ойи бошидаги видеоселектордан сўнг «янги массивлар учун шаҳар ёки туман марказига яқин, инфратузилмага эга жойлар танланиб, дастлабки лойиҳалар шакллантирилгани», таъкидланади; «Ўзбекистон 24» телеканалининг 30 ноябрдаги репортажида массивларни шаҳар ва туман марказларига яқин, инфратузилмага эга жойларда қуриш кўрсатмаси президент томонидан берилгани айтилган.
Қурилиш вазири биринчи ўринбосарининг қўшимча қилишича, президент тақдимот чоғида энергия тежамкорликка алоҳида қаратишга, «энг камида умумфойдаланиш майдонларидаги энергия сарфини муқобил энергиядан олиш бўйича» топшириқ берган. Вазир ўринбосарининг таъкидлашича, бунинг учун мавжуд норма ва стандартларга ҳам тегишли ўзгартиш ва қўшимчалар киритилади. Шунингдек, массивларнинг ландшафт архитектураси «Яшил макон» ғоясидан келиб чиқиб, қайта кўриб чиқилади.
Изоҳ (0)