«Инновацияларга бефарқ қараш бизни фақат истеъмолчига айлантириб қўйиши мумкин» — Инновациялар миллий офиси раҳбари Олимжон Тўйчиев билан суҳбат

Тошкент шаҳрида 22–27 ноябрь кунлари «Innoweek.uz-2021» халқаро инновацион ғоялар ҳафталиги бўлиб ўтди. «Дарё» мухбири ушбу ҳафталик доирасида қандай янги лойиҳалар намойиш этилгани, инновацияларни жорий этишдаги ютуқ ва муаммолар ҳақида Инновацияларни жорий қилиш ва технологиялар трансфери миллий офиси бош директори Олимжон Тўйчиев билан суҳбат қурди.

Суҳбат давомида «Дарё» мухбиринг ёшлар кўпинча чет элда аввал жорий этилган ёки ишлаб чиқаришга татбиқ этилган нарсаларни янги инновация сифатида кўрсатиши — велосипедни қайта кашф этишнинг кимга кераги бор, деган саволига Олимжон Тўйчиев қуйидагича жавоб берди:

«Менга бу каби саволларни кўп беришади. Ўзим ишлаб чиқариш соҳасидан келган, автомобилсозлик соҳасида таҳсил олган инсон сифатида масалани автомобиль мисолида тушунтиришга ҳаракат қиламан. Сиз билан биз биладиган халқаро брендлар: Германияда Mercedes-Benz, АҚШда General Motors, Японияда Toyota каби автомобиллар ишлаб чиқарилади. Агар эътибор берилса, уларнинг ўз моделлари, ўзига яраша янгиликлари, фарқли ва бир-бирига ўхшаш ҳолатлари ҳам бор. Агар мана автомобиллар бор-ку, бу нарсани ишлаб чиқаришимиз керак эмас экан, деган тушунча билан инновацияга ёндашадиган бўлсак, сал хато қиламиз. Чунки бу орқали ўзимизни маълум даражада чеклаб қўямиз. Бу ҳолатда бошқача ёндашув зарур. Чунки биз маълум бир муддат ўтгандан кейин ушбу технологияларнинг яратувчиси эмас, истеъмолчисига айланиб қоламиз. Шунақанги юқори хавфимиз мавжуд. Айнан шуларнинг олдини олиш учун ҳам биз ўзимизда маҳаллий ёшларимизнинг ғоялари ва таклифларини қўллаб-қувватлаймиз. Албатта, бунда хорижий аналоглардан фарқли тарафлари, ўхшаш тарафлари, кейинчалик маҳсулот, хизмат ёки лойиҳаларни қай даражада ўхшашлик бўлиш тарафларини муҳокама қилган ҳолда таҳлил қиламиз», — деди Инновациялар миллий офиси раҳбари.

Олимжон Тўйчиевнинг қўшимча қилишича, ёш инноваторлар, аввало, ихтироларни яратишда у ҳаётимизни қайси жабҳасида қўлланишига эътибор беришлари лозим.

«Эътибор берилиши муҳим бўлган иккинчи жиҳат — лойиҳани ўша эҳтиёжга қараб такомиллаштириш. Булар лойиҳанинг ҳаётийлигини таъминлашда энг асосий омиллардан ҳисобланади», — деди у.

Аввалроқ  «Innoweek.uz-2021» халқаро инновацион ғоялар ҳафталигида сунъий интеллект асосида яратилган биринчи ўзбек нутқ синтезатори намойиш этилгани ҳақида хабар берилган эди.