Вазирлар Маҳкамасининг «Тошкент шаҳрида ерусти ҳалқа метро линияларининг қурилиши» лойиҳасининг техник-иқтисодий ҳисобини тасдиқлаш тўғрисида»ги қарори қабул қилинди, деб хабар беради Норма.

Фото: «Дарё» / Мадина Нурман

Лойиҳа Ўзбекистон президентининг 2017 йилги «Тошкент шаҳрида ерусти ҳалқа метро линияларининг қурилиши лойиҳасини амалга ошириш чора-тадбирлари тўғрисида»ги қарори ижросини таъминлаш, шунингдек, транспорт инфратузилмасидан янада самарали фойдаланишни ташкил этиш, Тошкент метрополитенининг автобус шоҳбекатлари билан узвий боғлиқлигини таъминлаш мақсадида қабул қилинган.

Асосий техник-иқтисодий кўрсаткичларга кўра, лойиҳанинг умумий қиймати 354,36 миллион долларни ташкил этади. Хусусан:

  • Давлат бюджетидан ажратиладиган маблағлар — 208,398 миллион доллар;
  • Тикланиш ва тараққиёт жамғармаси кредити — 108,390 миллион доллар;
  • Хитойнинг «Эксимбанк»и кредити — 500 минг доллар.

Капитал қўйилмалар қиймати 317,288 миллион долларни ташкил этиб, улар машина ва ускуналар харид қилишга, қурилиш-монтаж ишлари, инвестиция давридаги молиявий харажатларга йўналтирилади.

Хитойнинг «Эксимбанк»и томонидан ажратилган кредит 5 йиллик имтиёзли даврга эга 20 йил муддатга мўлжалланган. Тикланиш ва тараққиёт жамғармаси кредити — 4 йиллик имтиёзли даврга эга 15 йил муддатга мўлжалланган.

Аввалроқ ушбу қарорга кўра, Тошкент метрополитени «Ўзбекистон темир йўллари» АЖ таркибидан чиқарилиши, Тошкентдаги 6 та метро бекати атрофида автотураргоҳлар ташкил этилиши тўғрисида хабар берилганди.

Мавзуга доир: Шавкат Мирзиёев метрони ривожлантириш лойиҳасини охиригача етказиш топшириғини берди

Эслатиб ўтамиз, Тошкентда 2020 йил Мустақиллик байрами арафасида Тошкент ерусти метросининг биринчи босқичи битказилган эди. Уни лойиҳалаштириш 2017 йилда бошланган. Қурилишнинг бориши давлат раҳбарининг эътиборида бўлган. Август ойининг охирида ушбу ерусти ҳалқа метросининг биринчи босқичи битказилиб, президент Шавкат Мирзиёев 29 август куни бу ерга ташриф буюриб, жамоатчилик билан бирга поездда юрган эди. Шу йилнинг 26 декабрь куни ерусти метросининг яна бир муҳим бўғини – Сергели йўналиши ишга туширилди. Президент Шавкат Мирзиёев ушбу транспорт объектини бориб кўрди. Шу ерда давлат ва жамоат ташкилотлари, оммавий ахборот воситалари вакиллари билан мулоқот бўлди.