Ўзбекистонда 10 ой ичида реабилитация марказларига мурожаат қилган фуқаролар кўпроқ қандай зўравонликка учрагани маълум қилинди

Ўзбекистонда 2021 йилнинг 10 ойида Зўрлик ишлатишдан жабр кўрган шахсларни реабилитация қилиш ва мослаштириш марказларига 7226 нафар фуқаро мурожаат қилган. Бу ҳақда Аёлларни реабилитация қилиш ва мослаштириш республика маркази директори Муқаддам Расулова АОКАда ўтказилган брифингда маълум қилди.

Брифингда маълум қилинишича, 2021 йилнинг 10 ойида Зўрлик ишлатишдан жабр кўрган шахсларни реабилитация қилиш ва мослаштириш марказларига 7226 нафар фуқаро мурожаат қилган, улардан — 4518 та ҳолатда турли зўравонлик содир этилган.

Шундан:

• 2457 та — руҳий;
• 1358 та — жисмоний;
• 37 та — жинсий;
• 666 та — иқтисодий зўравонлик;
• 2708 та ҳолатда оилавий низолар, келишмовчиликлар, ажрашиш масалалари билан мурожаатлар қайд этилган.

Таъкидланишича, тазйиқ ва зўравонликдан жабр кўрган, ўз жонига суиқасд қилган ёки ўз жонига қасд қилишга мойиллиги бўлган хотин-қизлар билан ўзаро мулоқот қилиш ва шошилинч руҳий, психотерапевтик, ҳуқуқий ёрдам кўрсатиш, маслаҳат бериш ва ахборот тақдим этиш учун 1146 ишонч телефони 24 соат узлуксиз ишламоқда.

Аввалроқ Ўзбекистонда гендер зўравонликка қарши 16 кунлик фаол ҳаракатлар кампанияси эълон қилингани, Халқ таълими вазирлигига ўз жонига қасд қилишга мойил қизлар рўйхатини шакллантириш вазифаси юклангани тўғрисида хабар берилганди.

Эслатиб ўтамиз, президентнинг 2021 йил 19 майдаги қарори билан Аёлларни реабилитация қилиш ва мослаштириш марказлари ташкил этилган. Улар бунгача Зўрлик ишлатишдан жабр кўрган шахсларни реабилитация қилиш ва мослаштириш ҳамда ўз жонига қасд қилишнинг олдини олиш марказлари деб номланган тузилмалар негизида ташкил этилган.