«Бунёдкор» футбол клуби ўз ходимларига октябрь ойи учун 1,5 миллиард сўмдан кўпроқ миқдордаги маошларни тўлаб беришни кечиктиргани ҳақида «Effect.uz» маълум қилди. Ушбу ҳолат Тошкент шаҳар Давлат меҳнат инспекцияси томонидан ўтказилган ўрганишда аниқланган.
Ижтимоий тармоқларда «Бунёдкор» футбол клуби томонидан ходимларга икки ойлик иш ҳақлари тўлаб берилмаётгани тўғрисида хабарлар тарқалди.
Инспекция томонидан ўрганиш давомида, айни вақтда клуб томонидан жами 393 нафар ходимга нисбатан октябрь ойи учун 1 миллиард 532 миллион 216 минг сўм миқдоридаги ойлик маошлари тўлаб берилиши кечиктирилгани аниқланган. Шунингдек, ҳозирда клуб ҳомийси «Ўзбекнефтгаз» АЖ томонидан маблағлар ажратилаётгани ва ходимларга ушбу тўловларни тўлаб бериш ҳаракатлари амалга оширалаётганини маълум қилинган.
Бундан ташқари, «Бунёдкор» футбол клуби бош директори Улуғбек Мирзаев номига ходимларга ойлик иш ҳақи бўйича юзага келган қарздорликни бартараф қилиш ҳамда кейинчалик ойлик иш ҳақларини ўз муддатида тўлаш бўйича Давлат меҳнат иснпексияси томонидан ёзма кўрсатма киритилган.
Эслатиб ўтамиз, 2021 йилнинг февраль охирларида «Бунёдкор» стадиони Тошкент ҳокими Жаҳонгир Ортиқхўжаев оталиғига ўтиши тўғрисида хабар берилганди.
Изоҳ (0)