Эфиопия ҳукумати мамлакатда олти ой муддатга фавқулодда ҳолат режимини эълон қилди. Бу ҳақда мамлакат ҳукуматининг жамоатчилик билан алоқалар хизмати бошлиғи Легесс Тулу ҳамда адлия вазири ва бош прокурор Гидеон Тимотиос маълум қилди, деб хабар беради Tengrinews.
Reuters’нинг ёзишича, эълон мамлакат бош вазири Абий Аҳмед фуқароларни «Тиграй озодлиги халқ фронти»дан ҳимоялаш учун қўлига қурол олишга чақирганидан икки кун ўтиб билдирилган.
Маълумотларга кўра, ушбу чора пойтахт Аддис-Абеба шимолидаги Тиграй минтақаси билан чегара яқинида жойлашган Амхара вилоятидаги Дессийе ва Комбольча шаҳарлари атрофидаги вазият билан боғлиқ.
«Мамлакатимиз ўз мавжудлиги, суверенитети ва бирдамлиги борасида жиддий хавф қаршисида турибди. Ва биз бу хавфни оддий ҳуқуқни муҳофаза қилиш тизимлари ва тартиблари орқали бартараф эта олмаймиз», — дейди адлия вазири Гидеон Тимотиос.
Унинг айтишича, фавқулодда ҳолатда ҳар қандай қонунбузарга, хусусан, «террорчилик гуруҳлари»ни молиялаштириш, моддий ва маънавий ёрдам кўрсатганлар 3 йилдан 10 йилгача қамалади.
Аддис-Абеба шаҳри администрациясининг маълум қилишича, одамлар ўз қуроллари рўйхатдан ўтказиши ва ўз туманларида тўпланиши лозим. Уйларда тинтувлар ўтказилмоқда ва тартиббузарлар ҳибсга олиняпти.
«Аҳоли ўз туманларида тўпланиши ва ўз ҳудудини қўриқлаши мумкин. Қуроли бор, лекин қўриқлаш ишларида иштирок эта олмайдиганларга қуролларини ҳукуматга ёки яқин қариндошлари ёки дўстларига топшириш тавсия этилади», — дейилади ҳукумат хабарида.
Эфиопия ҳукумати ва Тиграй минтақасидаги ҳукмрон «Тиграй озодлиги халқ фронти» партияси (ТPLF) ўртасидаги қуролли можаро 2020 йилнинг 4 ноябрда юзага келган. Бунга Эфиопия ҳукуматининг ТPLF мамлакат қуролли кучларининг ҳарбий базасига ҳужум уюштирганлик ҳақидаги айблови сабаб бўлганди.
Изоҳ (0)