Нигериянинг Лагос шаҳрида 21 қаватли бинонинг қулаши оқибатида камида 20 киши ҳалок бўлган. Бу ҳақда 3 ноябрь куни The Punch нашри хабар берди.
Ўтган кечада фавқулодда хизматлар Лагосдаги ҳодиса қурбонларининг сони 20 кишига етганини тасдиқлади. Айни вақтда тўққиз киши вайроналар остидан тирик ҳолда олиб чиқилган. Улардан уч нафари уйига, қолганлари касалхонага етказилган.
Ўз навбатида ҳалок бўлганлардан баъзиларининг оила аъзолари қутқарув операцияси секин олиб борилаётганидан шикоят қилди – улар одамларни қидириш ишларида иштирок этишга рухсат талаб қилди. Шунингдек, топилган жасадларнинг қариндошларига уларни таниб олиш учун узоқ вақт давомида рухсат берилмагани айтилмоқда. Таъкидлаш жоизки, авария хизматлари қулаш оқибатларини бартараф этишда бетон ва металл қирқувчи экскаваторлардан фойдаланмоқда.
Эслатиб ўтамиз, Нигериядаги ушбу янги қурилаётган 21 қаватли бино 1 ноябрь куни қулаб тушганди. Гувоҳларнинг маълум қилишича, бино қулаган вақтда у ерда 100 га яқин қурувчи ишлаётган бўлган, ҳозирда улар бедарак йўқолган деб ҳисобланмоқда.
Аввалроқ Грузиянинг Батуми шаҳрида 5 қаватли уй қулаб тушгани, Флоридада 12 қаватли турар жой қулаб тушиши оқибатида 99 киши бедарак йўқолгани тўғрисида хабар берилганди.
Изоҳ (0)