Туркманистонда 2020 йилнинг ёзида коронавирус ҳақида шеър ёзган 48 ёшли YouTube блогери Мурат Овезов беш йилга қамалди. Бу ҳақда «Хроника Туркменистана» хабар берди.
Овезов Туркманистон Жиноят кодексининг 228-моддаси «фирибгарлик» бўйича судланган, бироқ Turkmennews нашри манбалари иш қўзғатилишига ҳақиқий сабаб сифатида унинг YouTube’даги чиқишларини келтирмоқда.
Тошҳовуз вилоятининг Губадоғ туманида яшовчи Овезов ўз каналида мамлакатда содир бўлаётган воқеалар – дўконлардаги навбатлар, интернетга киришдаги қийинчиликлар, шунингдек, коронавирус билан боғлиқ вазият ва бу борада киритилган чекловлар ҳақида айтиб берган.
Мурат Овезов 2020 йил 12 июнда ўзининг биринчи видеолавҳасида пандемия ҳақида гапирган ва коронавирус тўғрисидаги «Аччиқ ҳақиқат» шеърини ўқиб берган.
Эркак тармоқ маркетинги билан шуғуллангани сабабли ўз канали орқали фойдалилик даражаси шубҳа остида бўлган айрим биологик фаол қўшимчаларни ҳам реклама қилган.
Аммо Turkmennews’нинг фикрича, айнан мамлакатда содир бўлаётган воқеалар ҳақидаги видеоси бу одамга нисбатан жиноий иш қўзғатилишига асл сабаб бўлган.
Эслатиб ўтамиз, 2 март куни туркманистонлик талаба Рўзгелди Чўлиев Москванинг Шереметьево аэропортида ҳибсга олинганди. У интернетда ҳукуматни танқид қилгани учун Туркманистон махсус хизматлари томонидан таъқиб қилинаётган эди. Чўлиев интернетда бир неча бор Туркманистон президентини танқид қилиб, видео жойлаштирган.
Изоҳ (0)