1994 йилги Будапешт меморандуми бўйича Украинанинг хавфсизлик кафолатлари бажарилмагани натижасида сайёра Европа марказида иккита «экологик бомба» — Қрим ва Донбасснинг бир қисмига эга бўлди. Украина президенти Владимир Зеленскийнинг бу борадаги баёноти БМТнинг иқлим бўйича Глазгода ўтказилган конференциясида маълум қилинган, деб хабар беради «РБК».
«Ноёб флора ва фауна оламига эга Қрим яримороли Россия ҳарбий денгиз кучларининг базасига айланди. Донбасснинг бир қисмида эса сув босган шахталар, тупроқ деградацияси, ичимлик суви етишмовчилиги кузатилмоқда. Бизнинг замонимизда фалокат қаерда бўлмасин, барчага тааллуқли», — дейди Зеленский Чернобил фалокатини эслатиб.
Шунингдек, Зеленский инсонлар сайёрани қутқариш бўйича бирор чора кўрмаса, нима содир бўлишини ҳам айтиб ўтган.
«Биз таслим бўлишимиз мумкин. Сув тошқинлари ва ёнғинлари ҳар ҳафта содир бўлади. Денгизларда фақат кимёвий ҳимоя костюмларида чўмила оламиз. Умримизнинг қолган қисмини респираторларда ўтказамиз. Тоза ичимлик суви — фақат дам олиш кунлари. Заҳарли бўлмаган тупроқда етиштирилган маҳсулотлар — фақат Янги йил ва алоҳида байрамларда. Дунёда ўртача умр кўриш давомийлиги 25-30 йил. Бу биз, инсоният учун адолатли жазо бўлиши мумкин. Ва сайёра бизники эмаслигини унутиб қўйганлар учун — бу сайёра айиқлар, йўлбарслар, пандалар, коалалар, кит ва акулаларники», — дея прогноз қилади Украина президенти.
2021 йилнинг июнида Украина Экология вазирлиги 30-40 йилдан сўнг иқлим ўзгариши сабаб мамлакатда чўллашиш кузатилишини прогноз қилганди. «Олимларнинг маълумотларига кўра, Украина иқлим ўзгариши сабаб ўта юқори ҳарорат ва об-ҳаво фалокатлари зонасига ўтмоқда. Яқин 30-40 йил ичида мамлакатнинг катта қисми чўллашиши хавфи бор», — дейилади идора баёнотида.
Аввалроқ Бирлашган Миллатлар Ташкилоти Фрэнки исмли динозавр дунё етакчиларига мурожаат қилиб, инсониятни иқлим ўзгариши хавфидан огоҳлантиргани акс этган видеороликни эълон қилганди.
Изоҳ (0)