Dunyoning 100 dan ortiq yetakchilari 2030-yilga borib o‘rmonlarning yo‘qolib ketishi jarayonini to‘xtatishga kelishib oldi. Bu Glazgoda o‘tkazilayotgan iqlim bo‘yicha sammit doirasidagi birinchi eng yirik kelishuvga aylandi, deb xabar beradi “Interfaks”.
Ushbu qarorni qo‘llab-quvvatlaganlar orasida Braziliya, Rossiya, Kanada, Kolumbiya, AQSh, Buyuk Britaniya va Indoneziya ham bor. Ta’kidlanishicha, ushbu mamlakatlar hisobiga dunyodagi o‘rmonlarning qariyb 85 foizi to‘g‘ri keladi.
Kelishuvga ko‘ra, 20 milliard dollar ajratiladi, uning bir qismi o‘rmon yong‘inlari oqibatida jabr ko‘rgan hududlarni qayta tiklash va o‘rmon yong‘inlariga qarshi kurashishga sarflanadi. Shuningdek, 28 mamlakatning hukumati qishloq xo‘jaligi mahsulotlari, xususan, palma yog‘i, kakao va soya ishlab chiqarish uchun o‘rmonlarni kesishni to‘xtatadi.
Britaniya OAVlarining ma’lumotlariga ko‘ra, Buyuk Britaniya bosh vaziri Boris Jonson 2-noyabr kuni o‘tkaziladigan yig‘ilishda dunyoda o‘rmonlarning kesilishi muammosini muhokama qilib, erishilgan kelishuvni “o‘rmonlar himoyasi va uni qayta tiklash bo‘yicha muhim bitim” deb ataydi.
“Ushbu muhim va boy ekotizimlar — tabiiy soborlar — bu sayyoramizning o‘pkasi. Ular omon qolishimiz uchun favqulodda muhim”, — deydi Jonson.
BMTning iqlim bo‘yicha Glazgoda 31-oktabr kuni boshlangan konferensiyasi 12-noyabrga qadar davom etadi. Tadbirda qariyb 200 ga yaqin mamlakatdan vakillar qatnashishi kutilmoqda.
Avvalroq BMTning iqlim bo‘yicha sammiti bo‘lib o‘tadigan Glazgo shahrini suv bosgani, AQShning Chikago shahri iqlim o‘zgarishi tufayli yo‘q bo‘lib ketish xavfi ostida ekani to‘g‘risida xabar berilgandi.
Izoh (0)