AQShning aholi soni bo‘yicha eng yirik shaharlaridan biri bo‘lgan Chikago yo‘qolib ketish xavfi ostida. Olimlar iqlim o‘zgarishi bilan bog‘laydigan so‘nggi besh yildagi eng ko‘p yog‘ingarchilik aholi punktiga xavf solmoqda, deb yozadi CNBC.
Chikago daryosi
Foto: Pixabay
Ta’kidlanishicha, tez-tez sodir bo‘layotgan yog‘ingarchilik va qurg‘oqchilik Chikagoda shu nomdagi mahalliy daryo hamda Michigan ko‘li suv sathining keskin o‘zgarishiga olib kelmoqda, bu esa shaharga jiddiy zarar yetkazmoqda. Avvalroq Chikagoda suv toshqini yuz bergan taqdirda qo‘llaniladigan yomg‘ir suvi sistemasi yaratilgandi. Bu ko‘l va daryodagi suv darajasini nazorat qiluvchi shlyuzlardir. Biroq yog‘ingarchilik shunchalik kuchli bo‘lganidan, tizim ishlamay qolgan.
O‘tgan qishda kuchli yog‘ingarchilik tufayli Michigan ko‘lidagi suv sathi rekord darajada ko‘tarilgandi. To‘lqinlar mahalliy avtomagistralni qoplab olgan, binolarning uchinchi qavatigacha suv bosgan.
O‘shanda Chikago daryosi ham qirg‘oqlaridan toshib ketgan va elektr energiyasi uzilishiga sabab bo‘lgandi.
“Eng katta xavf shundaki, iqlim o‘zgarishi suv darajasiga ta’sir qilmoqda, shahar infratuzilmasi, qirg‘oqlari va binolari bunga ortiq dosh berolmaydi”, — deydi Michigan universiteti atrof-muhit va barqaror rivojlanish maktabi dotsenti Dryu Grounvold.
Uning so‘zlariga ko‘ra, ko‘l atrofidagi boshqa shaharlar ham xavf ostida. Shu bilan birga uzoq davom etgan qurg‘oqchilik Michigan ko‘lidagi suv sathining pasayishiga olib kelmoqda. Chikago va AQShning butun O‘rta G‘arbiy qismini suv bilan ta’minlash ushbu ko‘lga bog‘liq bo‘lib, bu mintaqa iqtisodiyoti uchun katta ahamiyatga ega.
AQSh armiyasi muhandislar korpusi 2020-yildan beri Chikago qirg‘oq chizig‘ini mustahkamlash uchun 500 million dollar sarfladi. Shaharda o‘n minglab daraxtlar ekildi, chunki barglar kuchli yog‘ingarchilikdan qo‘shimcha himoya qilishi mumkin.
Bundan tashqari, Chikago karbonat angidrid chiqindilarini kamaytirishga chaqirmoqda, chunki bu mahalliy darajada global isishga qarshi kurashning yagona chinakam yechimidir.
