Қозоғистон ҳукумати Facebook’дан ижтимоий тармоқнинг ички контент тизимига кириш учун рухсат олганини эълон қилди. Бироқ Facebook буни инкор этмоқда

Қозоғистон Ахборот ва ижтимоий ривожланиш вазирлиги (АИРВ) ва Facebook ижтимоий тармоғи интернетда болалар ҳуқуқларини ҳимоя қилишга алоҳида эътибор қаратган ҳолда зарарли контентга қарши курашда яқиндан ҳамкорлик қилиш бўйича келишувга эришди. Бу ҳақда вазирлик матбуот хизматига таяниб, Tengrinews  хабар берди.

«Қозоғистон Республикаси ҳукуматига ахборот маконининг хавфсизлигини таъминлаш масаласини ҳал қилишда ёрдам бериш мақсадида Facebook Қозоғистонга ‘Контент ҳақида хабар бериш тизими’ — Content Reporting System (CRS) ички тизимига тўғридан-тўғри эксклюзив киришни тақдим этди. CRS вазирликка Facebook’нинг глобал контент сиёсати ва Қозоғистон Республикаси миллий қонунчилигининг бузилишини ўз ичига олган контент ҳақида зудлик билан хабар беришга имкон беради», — дейилади хабарда.

Вазирлик маълумотларига кўра, Қозоғистон Марказий Осиёда тизимга кириш ҳуқуқини қўлга киритган ва контент сиёсати учун масъул бўлган халқаро Facebook жамоаси билан тўғридан-тўғри алоқа каналига уланган биринчи давлатдир.

АИРВ, шунингдек, Facebook’нинг жамоатчилик билан алоқалар бўйича минтақавий директори Жорж Ченнинг сўзларига асосланиб, компания Қозоғистон ҳукумати билан, айниқса, интернетда болалар хавфсизлигини таъминлаш бўйича ҳамкорликда олиб борилаётган ишлардан мамнун эканини айтди.

«Узоқ муддатли ҳамкорлигимиз йўлидаги биринчи қадам сифатида биз Қозоғистон ҳукуматига ‘Контент ҳақида хабар бериш тизими’дан фойдаланиш имкониятини беришдан мамнунмиз, бу Қозоғистон ҳукуматининг ваколатли органларига зарарли контент билан янада самарали курашишда ёрдам беради, деб умид қиламиз. Facebook жамоаси, шунингдек, кибермакон хавфсизлигини таъминлаш манфаати йўлида қозоғистонлик мутахассисларни ўқитишни давом эттиради», — дея вазирлик Facebook вакили сўзларидан иқтибос келтирди.

Қайд этилишича, 28 октябрь куни Facebook жамоаси вазирлик мутахассислари учун тизим билан ишлаш бўйича тренинг ўтказган. Ноябрь ойининг бошидан вазирлик жамоа билан иш бошлайди.

АИРВ маълумотларига кўра, томонлар, шунингдек, доимий ҳамкорлик механизмини йўлга қўйиш, жумладан, вазирлик билан яқиндан ҳамкорлик қиладиган Facebook ҳудудий офисининг ваколатли вакилини белгилашга ҳам келишиб олган.

Facebook тармоғининг эгаси Meta Platforms Қозоғистон АИРВнинг Facebook Қозоғистонга ижтимоий тармоқнинг «Контент ҳақида хабар бериш тизими»га эксклюзив кириш учун рухсат бергани ҳақидаги баёнотини рад этмоқда. Бу ҳақда Reuters агентлигига Facebook’нинг Осиё-Тинч океани минтақасидаги сиёсий коммуникациялар директори Бен Макконаги электрон почта орқали хабар берган.

«Биринчидан, биз Қозоғистон ҳукумати билан қўшма баёнот чиқармадик, аксинча, Қозоғистон ҳукумати бизнинг ҳукуматлардан маҳаллий қонунларни бузувчи контентни чеклаш тўғрисидаги сўровларимиз бўйича глобал жараён давомида улар билан олиб борган муҳокамаларимиз асосида ўз баёнотини берди», — дейилади хабарда.

Макконагининг қўшимча қилишича, бу жараён «фақат Қозоғистонга хос эмас, бу бутун дунё ҳукуматлари қўллаётган жараёндир». Ўз навбатида, Қозоғистон АИРВ раҳбари Аида Балаеванинг айтишича, аввалроқ эълон қилинган баёнот матни «унда тилга олинган ҳудудий офис раҳбарияти билан тўлиқ келишилган».

«Facebook’нинг қўшма баёнотни инкор этиши ҳақида. ОАВнинг қўшма баёнот Меtа (Facebook) Осиё-Тинч океани минтақаси бўлимининг алоқалар бўйича директори Бен Макконаги томонидан рад этилгани ҳақидаги хабарлари муносабати билан Қозоғистон Республикаси Ахборот ва ижтимоий ривожланиш вазирлиги қуйидагиларни маълум қилади. Ахборот ва ижтимоий ривожланиш вазирлиги Гонконгда жойлашган Хитой, Мўғулистон ва Марказий Осиё минтақаси бўйича Меtа (Facebook) ҳудудий офиси билан музокаралар ўтказди. 1 ноябрь куни эълон қилинган қўшма баёнот матни ва унинг оммавий ахборот воситаларида эълон қилиниши мазкур ҳудудий офис раҳбарияти билан тўлиқ келишилган», — деб ёзди вазир ўзининг Facebook’даги саҳифасида.

Эслатиб ўтамиз, 28 октябрь куни Facebook компаниясининг номи Меtа’га ўзгарди. Қайд этилишича, Facebook ушбу йўл билан компаниянинг нафақат битта ижтимоий тармоқ, балки WhatsApp, Instagram, Oculus ва бошқа активларининг ҳам эгаси эканлигини намойиш қилмоқчи.