Гавайи университети астрономлари Ердан 417 ёруғлик йили узоқликда жойлашган 2М0437 экзопланетасини суратга олди. Бу бошқа юлдузлар системасида аниқланган энг ёш сайёралардан биридир, дейилади олимларнинг Кек расадхонаси расмий сайтида эълон қилинган маълумотларида.
Фото: Subaru Telescope
Массаси тўртта Юпитерга тенг 2М0437b газ гиганти шаклланишни аранг якунлаган — у атиги 2—5 миллион ёшда. Таққослаш учун, Ер ва умуман Қуёш системасининг ёши 4,5 миллиард йилдан ошади. Бундай кичик ёш туфайли 2М0437б улкан материя массаларининг бирлашиши ва сиқилишидан кейин совишга улгурмаган — унинг сиртидаги ҳарорат 1100 градусдан ошади.
417 ёруғлик йили — оптик кузатувлар учун узоқ масофа, шунинг учун олимлар унинг турини ойдинлаштириш ва янада аниқроқ тасвирини олиш учун 2М0437 ни кузатишга 3 йил вақт сарфлади. Кузатувлар учун астрономлар диаметри 8,2 метр ойнали ва мослашувчан оптикали «Субару» телескопидан фойдаланган — у денгиз сатҳидан 4145 метр баландликда, Гавайининг Мауна-Кеа тоғи тепасида жойлашган Кек расадхонасига ўрнатилган бўлиб, у ердаги кузатувларга Ер атмосфераси деярли халал бермайди.
«Ушбу тасодифий кашфиёт биз телескоплар ёрдамида тўғридан-тўғри кузатишимиз мумкин бўлган сайёралар рўйхатига қўшилади. Бу сайёранинг нурини таҳлил қилиб, биз унинг таркибини ва эҳтимол, қаерда ва қандай пайдо бўлганини билиб оламиз», — дейди Маноадаги Гавайи университети профессори, астроном Эрик Гайдос.
Келажакда олимлар сайёранинг ўз юлдузи атрофида айланишини ўлчаш ниятида. NASA’нинг кузда ишга туширилиши кутилаётган «Жеймс Уэбб» телескопи ёрдамида тадқиқотчилар 2М0437b атмосферасидаги газларни кўриши ёки материя атрофидаги ойсимон дискни аниқлаши мумкин бўлади.
