Россия президенти Владимир Путин Федерация таркибига кирувчи субъектлар ҳокимиятларига кўнгилочар тадбирлар ўтказишни тақиқлаш ҳамда кечки ва тунги вақтда овқатланиш хизматларини кўрсатишга чеклов қўйиш бўйича топшириқ берди. Бу ҳақда ҳукумат аъзолари билан учрашув якунида Кремль сайтида эълон қилинган кўрсатмалар рўйхатига таяниб, Meduza хабар берди.
Бундан ташқари, губернаторларга вакцина олмаган 60 ёшдан катта аҳолини ўзини изоляция қилишга юбориш тавсия этилди. Мазкур ёш тоифасидаги ишчилар, шунингдек, сурункали касалликларга чалинган ходимлар, агар улар эмланмоқчи бўлса, «эмланиши ва иммунитетини шакллантириши учун» тўрт ҳафта давомида масофадан ишлаш режимга ўтказилиши керак.
Бошқа барча ишчиларга вакцинациядан ўтиш учун иш ҳаққи сақланган ҳолда икки кунлик таътил берилади.
Россияда коронавирус инфекцияси билан касалланиш даражаси ошиб бормоқда. Кунлик касалланиш ва ўлимнинг янги рекордлари қайд этилмоқда. Хусусан, 25 октябрь куни COVID-19 га қарши кураш федерал штаби берган хабарга кўра, бир суткада 37 930 кишида инфекция аниқланди, 1069 киши коронавирус ташхиси билан вафот этди.
Аввалги суткада мамлакатда 35 660 кишида, ундан аввал эса 37 678 кишида COVID-19 аниқланганди. Россияда 19 октябрдан бери ҳар куни коронавирус туфайли мингдан ортиқ ўлим қайд этилмоқда.
Путин мамлакатда коронавирус инфекцияси билан касалланиш ҳолатлари ортаётгани сабаб 30 октябрдан 7 ноябрга қадар иш кунини ишга чиқилмайдиган ҳафталик дея эълон қилган. Эпидемиологик вазият кескин тус олган вилоятларда ишланмайдиган ҳафталикни олдинроқ жорий этишга рухсат берилган.
Изоҳ (0)