Судан армияси генерали Абдул Фаттоҳ ал-Бурҳон мамлакатда фавқулодда ҳолат эълон қилиб, ижроия ҳокимияти — ҳукумат ва суверен кенгашни тарқатиб юборди. Бу ҳақда «Интерфакс» хабар берди.
Генералнинг сўзларига кўра, сўнгги пайтларда мамлакатдаги сиёсий кучлар ўртасида юз бераётган зиддиятлар армияни вазиятга аралашишга мажбур қилган. Ал-Бурҳон Судан халқаро шартномаларга содиқ қолишини ва бир мунча вақт ўтгач, мамлакат фуқаролик бошқарувига қайтиши мумкинлигини ваъда қилди, бироқ ҳеч қандай муддатни айтмади. Тахминларга кўра, бунга 2023 йил июль ойида бўлиб ўтадиган сайловлардан кейин эришиш мумкин.
Судан ҳарбийлари 25 октябрга ўтар кечаси мамлакат муваққат ҳукуматининг бир қатор вазирларини, жумладан, муваққат бош вазир Абдулла Хамдокни ҳибсга олди.
CNN телеканалига кўра, Хамдок ва унинг рафиқаси Муна Абдулла қўлга олинган ва номаълум жойга олиб кетилган. Кейинроқ мамлакат Ахборот вазирлиги у ҳарбийлар томонидан уй қамоғига жойлаштирилганини маълум қилди. Ҳибсга олинишидан аввал Судан бош вазири аҳолини уни қўллаб-қувватлаш учун тинч намойишларга чақирган. Унинг чақириғига жавобан пойтахт Хартум кўчаларида норозилик намойишлари бошланди. Намойишчилар Судан армияси бош қароргоҳига яқинлашмоқчи бўлганида, ҳарбийлар уларга қарата ўқ узди — камида 12 киши жароҳат олди.
Судан тиббиёт касаба уюшмаси аъзолари митинглар билан кўчаларга чиқди. Беморларга фақат ўта зарур ёрдамлар кўрсатилмоқда. Суданликлар, шунингдек, мамлакатдаги асосий мухолифатчи ҳаракат «Озодлик ва ўзгариш кучлари» чақириғи билан ҳарбийларга қарши туриш учун кўчаларга чиқа бошлади.
Суданда ҳарбийлар ва фуқаролик кучлари ўртасидаги муносабатларда инқироз бир неча ҳафтадан бери давом этмоқда. Зиддиятларни мулоқот орқали ҳал қилишга уринишлар кутилган натижага олиб келмади, қарама-қарши лагерлар ўз тарафдорларини кўчаларга олиб чиқди.
Судан армияси Хартумдаги давлат телерадиостанцияси биносини назоратга олган. Кўплаб ходимлар ҳибсга олинган. Пойтахтда мобил алоқа ва интернет блокланган.
Судандаги ҳарбийларнинг сўнгги ҳаракатлари АҚШ расмийларини хавотирга солаётгани хабар берилди. «АҚШ (Судандаги) ўтиш даври ҳукумати ҳарбийлар томонидан босиб олингани ҳақидаги хабарлардан қаттиқ хавотирда», — деб ёзади махсус элчи Жеффри Фелтман АҚШ Давлат департаментининг Африка ишлари бўйича бюроси Twitter’ида.
Фелтманнинг қўшимча қилишича, ҳокимятни бу тарзда эгаллаш Конституциявий декларацияга ҳам, Судан халқининг демократик интилишларига ҳам зид. Буни мутлақо қабул қилиб бўлмайди.
Махсус элчи ўтиш даври ҳукуматига зўрлик билан киритилган ҳар қандай ўзгариш АҚШнинг Суданга ёрдам беришдан бош тортишига сабаб бўлиши мумкинлиги ҳақида огоҳлантирди. Бу ҳақда Вашингтонда бир неча бор айтилган.
Изоҳ (0)