Татаристон Давлат кенгаши (мамлакат парламенти) республикадаги президент лавозими номини ўзгартиришни назарда тутувчи қонун лойиҳасини қўллаб-қувватлашдан бош тортди, деб ёзади Meduza.
Ҳужжат Давлат Думасига сентябрь ойи охирида тақдим этилганди. Унда Россия таркибига кирувчи ҳудудлардаги энг юқори мансабдор шахслар учун умумий ном — Россия Федерацияси субъектининг раҳбари номини белгилаш таклиф қилинади.
Татаристон Давлат кенгаши қонун лойиҳаси қоидаларини «демократик федерал ҳуқуқий давлат сифатида Россия Федерациясининг конституциявий тузилиши асосларига зид», деб ҳисоблайди.
Ҳужжатни қўллаб-қувватламаслик тўғрисидаги қарор бир овоздан қабул қилинган. Давлат кенгашининг Давлат қурилиш ва маҳаллий ўзини ўзи бошқариш қўмитаси раҳбари Алберт Хабибуллин Давлат Думасидаги Татаристондан бўлган депутатларга республика парламенти позициясини қўллаб-қувватлашни, қонун лойиҳасининг биринчи ўқилишидан сўнг эса уни яна муҳокама қилишни таклиф қилган.
Татаристон Россия таркибидаги унинг раҳбари президент деб аталувчи ягона ҳудуд бўлиб қолмоқда. Қолган республикаларда «раҳбар» номи қўлланилади.
Федерация субъектларининг энг юқори мансабдор шахслари номларини бирлаштиришни назарда тутувчи қонун лойиҳаси Давлат Думасининг Давлат қурилиши ва қонунчилик қўмитаси раиси Павел Крашенинников ва Федерация кенгашининг конституциявий қонунчилик ва давлат қурилиши қўмитаси раҳбари Андрей Клишас томонидан тақдим этилган. Худди шу ҳужжатда ҳудуд раҳбари лавозимлиги учун муддатлар сонига қўйилган чекловларни олиб ташлаш таклиф қилинган.
Изоҳ (0)