ЖССТ раҳбари коронавирус пандемияси устидан ғалаба қозониш имкониятини баҳолади

Инсониятнинг коронавирус пандемиясини енгиб ўтишга имконияти бор. Бу ҳақда Жаҳон соғлиқни сақлаш ташкилоти Тедрос Гебрейесус маълум қилди, деб хабар беради «РИА Новости».

«Пандемия бутун дунё уни тугатишга қарор қилганида якунланади. Бу бизнинг қўлимизда», — дейди ЖССТ раҳбари.

Гебрейесуснинг маълум қилишича, инсониятнинг вирус устидан ғалаба қозонишга барча имкониятлари мавжуд. «Аммо дунё ушбу воситалардан яхши фойдалана олмади», — дея қўшимча қилади у.

Амалдор ЖССТнинг мақсадини эслатиб ўтган — 2021 йил охирига қадар ҳар бир мамлакат аҳолисининг камида 40 фоизини эмлаш. Гебрейесуснинг таъкидлашича, бунга мамлакатлар ва вакцина етказиб беришни назорат қилаётган компанияларнинг баёнотлари уларнинг ҳаракатларига мос келса, эришиш мумкин.

Ташкилот раҳбари ушбу кўрсаткичга эришган мамлакатларни дори воситаларини  COVAX халқаро механизми доирасида устуворлик тартибида етказиб беришга чақирган. Шу билан бирга, Гебрейесус пандемияни тугатишда вакциналарга нисбатан интеллектуал мулк ҳуқуқларини тўхтатиш кераклигини қайд этган.

Сўнгги маълумотларга кўра, бутун дунёда коронавирусга чалинганлар сони 242 миллион кишидан ошган. Ҳозирга қадар инфекция оқибатида 4,9 миллион одам вафот этган.

Эслатиб ўтамиз, октябрь бошларида БМТ Бош ассамблеясининг раҳбари 2023 йилгача дунё аҳолисини COVID-19 га қарши эмлашга эришиш зарурлигини айтганди.