Тошкент вилоятида ҳайдовчилик гувоҳномаси бўлмаган йигит бошқарувидаги «Жигули» ЙТҲга учради. Ҳайдовчи шифохонада вафот этган

ИИВ ЙҲХББ ижтимоий тармоқларда тарқалган Юқори Чирчиқ туманида содир бўлган авария видеоси юзасидан маълумот берди.

Ижтимоий тармоқларда Тошкент вилоятининг Юқори Чирчиқ туманида 2003 йил туғилган йигит бошқарувидаги «Жигули» катта тезликда ҳаракатланиб, йўл-транспорт ҳодисасига учрагани тасвирланган видео тарқалганди.

Маълум қилинишича, видеодаги ҳолат 1 сентябрь куни соат 14:00 ларда туман ҳудудидан ўтган 4П-15 Қизилтоғ—Янгибозор автомобиль йўлининг 67-километрида содир бўлган. Таъкидланишича, 18 ёшли М.М. (ҳайдовчилик гувоҳномасига эга бўлмаган) «ВАЗ-2107» русумли автомобилда ҳаракатланаётиб, рул бошқарувини йўқотган ва йўлдан чиқиб кетиб, чап томондаги бетон деворга урилган.

Оқибатда ҳайдовчи М.М. оғир тан жароҳатлари олиб шифохонада вафот этган.

Мазкур ЙТҲ юзасидан Юқори Чирчиқ тумани ИИБ ҳузуридаги Тергов бўлими томонидан тергов ҳаракатлари олиб борилмоқда.

Аввалроқ Тошкентда ЙТҲ юзага келтириб, воқеа жойидан қочиб кетган Spark топилгани, уни «права»си бўлмаган аёл бошқаргани, Сурхондарёда ЙПХ ходимининг талабига бўйсунмай, қарама-қарши йўналишда ҳаракатланган Damas’ни 9-синф ўқувчиси бошқаргани тўғрисида хабар берилганди.