Surxondaryo viloyatining Qumqo‘rg‘on tumani YPX maskanida inspektorning to‘xtash ishorasiga amal qilmay, harakatlanishni davom ettirgan Damas avtomobilini 9-sinf o‘quvchisi boshqarayotgani aniqlandi. Bu haqda IIV YHXBB axborot xizmati xabar berdi.

Kadr: Telegram

Ma’lum qilinishicha, avtomobil haydovchisi YPX inspektorining qonuniy talabiga bo‘ysunmay, qarama-qarshi yo‘nalishda harakatlanishni davom ettirgan.

Sherobod tumanidagi maktabning 9-sinf o‘quvchisi bo‘lgan yigitning so‘zlariga ko‘ra, u onasining mazasi yo‘qligi uchun mashinani Sho‘rchidan boshqarib kelayotgan bo‘lgan.

Holat bo‘yicha yigit bilan tushuntirish ishlari olib borilgan, qoidabuzarlik yuzasidan ma’muriy bayonnoma rasmiylashtirilgan. Avtomobil jarima maydonchasiga joylashtirilgan.

Ta’kidlash kerakki, Surxondaryoda haydovchilik guvohnomasisiz avtomobil boshqarish holatlari birinchi bor qayd etilmayapti. Xususan, avvalroq Sherobodda haydovchilik guvohnomasi bo‘lmagan yigit boshqaruvidagi “Jiguli” 11 yoshli piyodani urib yuborgani va jabrlanuvchi shifoxonada vafot etgani, Boysunda haydovchilik guvohnomasi bo‘lmagan yigit boshqaruvidagi Nexia pastlikka tushib ketishi oqibatida 17 yoshli qiz halok bo‘lgani to‘g‘risida xabar berilgandi.