Toshkent viloyatida haydovchilik guvohnomasi bo‘lmagan yigit boshqaruvidagi “Jiguli” YTHga uchradi. Haydovchi shifoxonada vafot etgan

IIV YHXBB ijtimoiy tarmoqlarda tarqalgan Yuqori Chirchiq tumanida sodir bo‘lgan avariya videosi yuzasidan ma’lumot berdi.

Ijtimoiy tarmoqlarda Toshkent viloyatining Yuqori Chirchiq tumanida 2003-yil tug‘ilgan yigit boshqaruvidagi “Jiguli” katta tezlikda harakatlanib, yo‘l-transport hodisasiga uchragani tasvirlangan video tarqalgandi.

Ma’lum qilinishicha, videodagi holat 1-sentabr kuni soat 14:00 larda tuman hududidan o‘tgan 4P-15 Qiziltog‘—Yangibozor avtomobil yo‘lining 67-kilometrida sodir bo‘lgan. Ta’kidlanishicha, 18 yoshli M.M. (haydovchilik guvohnomasiga ega bo‘lmagan) “VAZ-2107” rusumli avtomobilda harakatlanayotib, rul boshqaruvini yo‘qotgan va yo‘ldan chiqib ketib, chap tomondagi beton devorga urilgan.

Oqibatda haydovchi M.M. og‘ir tan jarohatlari olib shifoxonada vafot etgan.

Mazkur YTH yuzasidan Yuqori Chirchiq tumani IIB huzuridagi Tergov bo‘limi tomonidan tergov harakatlari olib borilmoqda.

Avvalroq Toshkentda YTH yuzaga keltirib, voqea joyidan qochib ketgan Spark topilgani, uni “prava”si bo‘lmagan ayol boshqargani, Surxondaryoda YPX xodimining talabiga bo‘ysunmay, qarama-qarshi yo‘nalishda harakatlangan Damas’ni 9-sinf o‘quvchisi boshqargani to‘g‘risida xabar berilgandi.