Тошкентда фуқаро ўз ҳаёти учун хавф туғдириб, Matiz эшигига осилган ҳолда сураткашлик қилаётгани акс этган сурат ижтимоий тармоқларда кенг тарқалганди. Тошкент шаҳар ИИББ ушбу шахс ва машина ҳайдовчиси жаримага тортилганини маълум қилди.
Аниқланишича, ҳолат 9 октябрь куни, тахминан, соат 14:00 да рўй берган. Matiz’ни ишончнома асосида 22 ёшли Ж.Х. бошқарган, сураткашлик қилаётган шахс эса 26 ёшли У.Э. бўлган.
Йўловчига нисбатан Маъмурий жавобгарлик тўғрисидаги кодекснинг 138-моддаси 4-қисми (транспорт воситаси ҳаракатланаётган вақтда йўловчи томонидан тана қисмларини (қўлдан ташқари) салондан чиқариш бўйича маъмурий баённома расмийлаштирилиб, БҲМнинг 1 баравари — 270 минг сўм миқдорида жарима белгиланган. Автомобиль ҳайдовчиси ҳам жаримага тортилган.
«Ҳурматли фотосуратчилар, операторлар ва шу каби касблар эгалари. Юқоридаги ҳолатга ўхшаш хатти-ҳаракатлар нафақат қоидабузарлик ҳисобланади, балки ўз саломатлигингиз ва ҳаётингизни хавф остига қўяди. Хавфсизлигингизга қанчалик ишонишингиздан қатъи назар, йўлларда рўй бериши мумкин бўлган турли ҳолатларда бу ишингиз фожиали якунланиши мумкин», — дея фуқароларни огоҳликка чақирган пойтахт ИИББ.
Изоҳ (0)