2008 йилда Байденни қутқариб қолган таржимон Афғонистонни тарк этишга муваффақ бўлди
2008 йилда амалдаги АҚШ президенти Жо Байденни «Толибон» жангариларидан қутқаришга ёрдам берган афғонистонлик таржимон Аман Халилий мамлакатни тарк этишга муваффақ бўлди. Бу ҳақда таржимон ва унинг оиласини эвакуация қилган Human First Coalition ташкилоти маълум қилди.
Эвакуацияда ташкилотга Покистон бош вазири ИмронХон ҳамда АҚШ Давлат департаментининг бир нечта ходимлари, шу жумладан, давлат котиби Энтони Блинкен ҳамкорлик қилди.
Дастлаб Халилий ўз оиласи билан Афғонистондан Покистонга, сўнг у ердан бошқа мамлакатга олиб кетилган. Улар айнан қаерга кўчириб ўтказилганига аниқлик киритилмаган.
Human First Coalition Имрон Хонга ва АҚШ Давлат департаменти ходимларига ўз вақтида кўрсатилган ёрдам учун миннатдорлик билдирди. Шунингдек, АҚШ ҳукумати айни пайтда Покистон пойтахтида бўлган яна 200 нафар афғонистонликларга кўмаклашишга ваъда бергани маълум қилинди.
Аман Халилий Америка армиясига ишлаган ва расмий таржимон бўлган. 2008 йилда АҚШ Қуролли кучларининг иккита Black Hawk вертолёти Афғонистоннинг толиблар томонидан назорат қилинадиган туманига аварияли қўнишни амалга оширган. Унинг бортида уч нафар америкалик сенатор бўлган, булар — Жон Керри (Массачусетсдан сенатор, кейинчалик президент Барак Обама маъмуриятида давлат котиби бўлган, ҳозир эса давлат раҳбарининг иқлим бўйича махсус вакилидир), Чак Хейгл (Небраскадан сенатор, Обама даврида мудофаа вазири бўлган) ва ўша пайтда Делавер штати вакили бўлган Жо Байден эди.
Қўнганидан кейин улар ёрдам ҳақида сигнал юборган, уларнинг ёнига Халилий жўнатилган, у Humvee машинасида бир неча соат тоғлардан ошиб етиб келган. Асосан унинг саъй-ҳаракатлари билан сенаторларни хавфли тумандан олиб чиқиб кетишга муваффақ бўлишган.
Сентябрь бошида, «Толибон» ҳокимиятни эгаллаб олганидан кейин Халилий Байденга хат юбориб, уни оиласи билан Афғонистондан олиб кетишни сўради. «Салом, жаноб президент! Мени ва оиламни қутқаринг! Мени бу ерда қолдирманг!», — деб ёзди у. Оқ уй, ўз навбатида, таржимонга ёрдам қилишга ваъда берди. «Биз сизни чиқариб оламиз. Сизни хизматингиз учун мукофотлаймиз», — деди Оқ уй матбуот котиби Жен Псаки.
«Толибон», АҚШ ва Евроиттифоқ Доҳада музокаралар ўтказади
Евроиттифоқ, АҚШ ва «Толибон» ҳаракатининг расмий вакиллари 12 октябрь куни Қатар пойтахти Доҳада музокаралар ўтказади.Евроиттифоқ матбуот котиби Набила Массрали маълум қилишича, учрашув «Америка ва Европа томонига толиблар билан бир қатор масалаларни ҳал қилиш имконини беради», шу жумладан, мамлакатдан хоҳловчиларнинг эркин чиқиб кетиши, гуманитар ёрдамдан фойдаланиш имконияти, аёллар ҳуқуқларига риоя қилиниши ва Афғонистонга бошқа террорчилик гуруҳларининг қўйилмаслиги.
«Бу техник даражада расман фикр алмашиш бўлади, у Афғонистондаги ‘муваққат ҳукуматъни тан олишни билдирмайди», — дея қўшиб қўйди у.
«Толибон» НАТОнинг Афғонистондаги сиёсатини муваффақиятсизлик деб атади ва альянсни дипломатияга чақирди
«Толибон» ҳаракати НАТОнинг Афғонистон бўйича сиёсатини муваффақиятсиз деб ҳисоблайди ва альянсни энди дипломатияга эътибор қаратишга чақиради.«НАТО бош котиби қандайдир вақт мобайнида оғриқни ҳис қилиши ва Афғонистондаги муваффақиятсизлик ҳақида гапириши мумкин, аммо НАТО шуни тушуниши керакки, ҳужумлар вақти ўтди ва энди дипломатия йўлидан бориш керак», — деди «Толибон» ахборот ва маданият вазири ўринбосари Забиҳулла Мужоҳид.
Унинг қўшимча қилишича, толиблар «ҳеч қачон Афғонистондан Хитой ва АҚШ каби дунё мамлакатлари томонидан воситачилик уруши олиб бориш учун майдон сифатида фойдаланишга йўл қўймайди».
Шунингдек, Мужоҳид «Ислом Амирлиги аёлларга ўқиш ва ишлаш ҳуқуқини бериш имкониятини кўриб чиқишини», аммо бу мавзуни аввал диний мутахассислар ўрганиб чиқишини айтди. «Аёлларга ҳам иш керак, лекин дастлаб Афғонистон ислом амирлиги бу масалани кўриб чиқиш учун ислом уламоларига юборди. Бу мавзу тез орада муҳокама қилинади», — деди у.
Изоҳ (0)