КХДР ҳукумати фуқароларнинг яшаш шароитларини яхшилашни устувор вазифаларидан бирига айлантириши керак. Мамлакат раҳбари Ким Чен Ин Корея Меҳнат партияси тузилганининг 76 йиллиги муносабати билан қилган чиқишида шундай баёнот берди, деб ёзади «ТАСС».
Давлат раҳбари партия январь ойида бўлиб ўтган қурултойда белгиланган халқ хўжалигини ривожлантиришнинг беш йиллик режасини самарали илгари суришга қатъий қарор қилганини айтиб, уни фуқароларни озиқ-овқат ва уй-жой билан таъминлаш муаммоларини иложи борича тезроқ ҳал қилишга ундади. У ўз нутқида, шунингдек, партия қурилишининг сўнгги ўн йил ичидаги асосий босқичлари ҳақида гапирди.
Ким Чен Ин КХДРнинг Жанубий Корея ва АҚШ билан муносабатларини тилга олмади. У 2011 йил охирида ҳокимият тепасига келганидан бери биринчи марта Меҳнат партияси ташкил топганининг юбилейи муносабати билан маъруза қилди.
10 октябрь куни мамлакатда ҳукмрон партия ташкил этилганига 76 йил тўлди. Бу кун ҳарбий парад ва кучларни кўз-кўз қиладиган бошқа намойишларсиз ўтказилди. Газеталарда партия ва Ким Чен Иннинг мамлакат ва халқ олдидаги хизматларига бағишланган бир қанча мақолалар чоп этилган. Масалан, марказий «Нодон Синмун» таҳририяти фуқароларни раҳбарни қўллаб-қувватлаш учун сафарбарликка чақириб, Ким Чен Иннинг иқтисодий муаммоларни ҳал қилишдаги ҳаракатлари ҳақида мақолалар чиқарган.
Изоҳ (0)