Қашқадарё вилоятининг иккита туманида мактабгача таълим кластери ташкил этилади. Бу ҳақда Ўзбекистоннинг амалдаги президенти, ЎзЛиДеПдан президентликка номзод Шавкат Мирзиёев 11 октябрь куни қашқадарёлик сайловчилар билан бўлиб ўтган учрашувда айтди, дея хабар бермоқда «Дарё» мухбири.
«Вилоятда мактабгача таълим билан қамраб олиш даражаси 62 фоизга етказилади. Бунинг учун 40 та давлат ва 38 та хусусий, мингта оилавий боғча ташкил этилади.
Косон ва Шаҳрисабз педагогика коллежлари базасида мактабгача таълим кластери фаолияти йўлга қўйилади. Бунга Қарши давлат университети ва педагогика институти бош-қош бўлади. Қашқадарёнинг олис ва тоғли ҳудудлардаги барча фарзандларимиз мактабгача таълим билан қамраб олинади.
Деҳқонобод, Касби, Китоб, Миришкор, Қамаши, Чироқчи, Нишон, Яккабоғ ва Ғузорда боғча тўлови миқдори 2 баробарга камайтирилади», — деди Президент.
Қайд этилишича, вилоятда мактабгача таълимни ривожлантиришга бир триллион сўмдан зиёд маблағ йўналтирилади.
«Қашқадарёда 101 та мактаб 3 сменада ишлайди, 380 та мактабда спорт зал йўқ, 809 та мактаб тоза ичимлик суви, 169 та мактаб замонавий иситиш тизими билан таъминланмаган.
Келгуси беш йилда 22 та янги мактаб қурилади, 400 таси тўлиқ таъмирланади. Натижада 140 мингта қўшимча ўқувчи ўрни яратилади. Вилоятдаги 10 минг ўрта махсус маълумотли муаллимларга олийгоҳларда ўқиш учун квота ажратилади», — деди Мирзиёев.
Изоҳ (0)