Ўзбекистоннинг амалдаги президенти, ЎзЛиДеПдан президентликка номзод Шавкат Мирзиёев 11 октябрь куни қашқадарёлик сайловчилар билан бўлиб ўтган учрашувда Чироқчи тумани негизида Чироқчи ва Кўкдала туманларини ташкил этиш таклифини билдирди. Бу ҳақда «Дарё» мухбири хабар бермоқда.
Давлат раҳбарининг таъкидлашича, Чироқчи тумани ҳудуди 2,8 минг квадрат километр бўлиб, вилоятнинг салкам ярим миллион аҳолиси ушбу туманда яшайди.
Халқ қабулхоналарига келиб тушган мурожаатларга кўра, одамлар ўзининг кундалик муаммоларини ҳал қилиш, давлат идораларига бориш учун 2-3 соатлаб вақт сарфламоқда. Шунингдек, туман ичида жамоат транспорти ривожланмагани оқибатида одамлар марказга келиш учун бир нечта транспортдан фойдаланишга ва бунга 50 минг сўмгача харажат қилишга мажбур бўляпти.
«Шу билан бирга, ўз пайтида туман Чироқчи ва Кўкдала ҳудудларига бўлинган эди. Шу боис кўплаб аҳолининг мурожаатларини инобатга олиб, ушбу туман негизида Чироқчи ва Кўкдала туманларини ташкил этсак, нима дейсизлар?
Бундан ташқари, Шаҳрисабз тумани маркази ҳалигача Шаҳрисабз шаҳрида қолиб кетди. Бу туманнинг ривожланишини чекламоқда. Шуни инобатга олиб, Шаҳрисабз тумани марказини Чоршанба шаҳарчасига кўчириб, уни ривожлантириш бўйича алоҳида дастур қабул қилиш таклиф этилади», — дейди Шавкат Мирзиёев.
Аввалроқ Шавкат Мирзиёев Қарши давлат университети қошида Абу Муин Насафий номида илмий марказ ташкил этилишини айтганди.
Изоҳ (0)