Туркия парламенти иқлим бўйича Париж битимини ратификация қилиш ҳақидаги қонун лойиҳасини қабул қилди. Бу ҳақда Anadolu агентлигига таяниб «РБК» хабар берди.
«Туркия Буюк миллий мажлиси (парламенти) Бош ассамблеяси иқлим бўйича Париж битимини ратификация қилиш тўғрисидаги қонун лойиҳасини қабул қилди», — дейилади хабарда.
Таъкидланишича, қонун лойиҳаси парламентдаги барча сиёсий партиялар томонидан бир овоздан қўллаб-қувватланган.
Париж битими 2015 йилги иқлим конференциясида 196 мамлакат вакиллари томонидан имзоланган эди. Ҳужжат 2020 йилда расман кучга кирди. У 1997 йилда қабул қилинган Киото протоколи ўрнини эгаллади (иссиқхона газлари ажралиб чиқиши бўйича квоталарни кўзда тутади).
Париж келишувининг мақсадларидан бири — Бирлашган Миллатлар Ташкилотининг Иқлим ўзгариши тўғрисидаги конвенциясини «амалга оширишни кучайтириш», хусусан, глобал ўртача ҳарорат кўтарилишини Цельсий бўйича икки даражадан «пастда» ушлаб туриш ва ҳароратнинг кўтарилишини 1,5 даражагача чеклашга ҳаракат қилиш. Бошқа масалалар қаторида, ҳужжат иссиқхона газлари ажралиб чиқишини камайтиришни, шунингдек, экологик муаммоларни ҳал қилиш учун камбағал мамлакатларга йилига қарийб 100 миллиард доллар ажратишни назарда тутади. Бу миқдорни 2025 йилдан кейин ошириш режалаштирилган.
Ўзбекистон иқлим ўзгариши бўйича Париж битимини 2017 йил, 19 апрель куни имзолаган. Жаҳон АА хабарига кўра, шу куннинг ўзида Ўзбекистон Париж битимини имзолаган мамлакатлар рўйхатига киритилгани ҳақида ахборот материали тайёрланиб, БМТ Котибияти томонидан ташкилотга аъзо давлатлар ўртасида тарқатилган.
Изоҳ (0)