Япония ҳукумати тўлиқ таркибда истеъфога чиқди

Япония бош вазири Ёсихиде Суга ушбу лавозим учун кейинги муддатга номзодини қўймасликка қарор қилгач, Япония ҳукумати 4 октябрь куни тўлиқ таркибда истеъфога чиқди. Бу ҳақда Kyodo агентлигига таяниб, «РБК» хабар берди.

Япониянинг янги бош вазири собиқ ташқи ишлар вазири Фумио Кисида бўлади, у сайловда ғалаба қозониб, ҳукмрон Либерал-демократик партияси (ЛДП)нинг янги раҳбарига айланганди. 4 октябрдан у ўз лавозимига кириши ва янги кабинет тузиши керак.

Kyodo, ҳукмрон партиядаги манбаларга таяниб, хабар беришича, Кисида ҳукмрон партиядан юқори мартабали депутат Шуньичи Судзукини молия вазири этиб тайинлашни режалаштирмоқда. Бундан ташқари, у иқтисодий ва молиявий сиёсат вазири лавозимига 53 ёшли Дайширо Ямагиванинг номзодини кўриб чиқмоқда. 2012 йил декабридан бери молия вазирлигини бошқарган 81 ёшли Таро Асо ЛДП вице-президенти лавозимига ўтади.

Nikkei агентлиги хабар беришича, бўлажак бош вазир парламент қуйи палатаси учун сайловларни 31 октябрга белгиламоқчи. Аввалроқ Кисида уларни 7 ёки 14 ноябрга белгилаши тахмин қилинган эди.

Ёсихиде Суга коронавирусга қарши курашга эътибор қаратиш мақсадида, муддати тугагач, Япония бош вазири лавозимига қайта номзодини кўрсатмасликка қарор қилди. «Ҳам коронавирусга қарши чоралар ишлаб чиқиш, ҳам сайлов кампанияси мендан катта энергия талаб қилади. Мен иккаласини бир вақтнинг ўзида олиб боролмайман, шунинг учун биттасини танлашимга тўғри келди», — дея тушунтирди у.

Август ойи бошида бош вазир фаолиятини маъқуллаш бўйича рейтинг энг паст кўрсаткичга (28 фоиз) тушиб кетганди. Бу, хусусан, мамлакатда бўлиб ўтган Олимпия ўйинлари фонида коронавирус дельта штаммининг тез тарқалиши туфайли рўй берди.

Шу билан бирга, Токиодаги Миллий сиёсий тадқиқотлар институти Харуката Такенага NBC News телеканалига маълум қилишича, Олимпия ўйинлари бош вазир лавозимига таъсир қилган бўлса-да, ҳал қилувчи омилга айланмаган. Янги бош вазир бўлиши кутилаётган Кисида ҳукуматнинг коронавирусга қарши курашини танқид қилган. Унинг таъкидлашича, расмийлар қўшимча шифохона ётоқларини ташкил қилиш учун етарли маблағ ажратмаган ва вазиятни бошқариш учун марказлаштирилган орган яратмаган.