Япония парламентининг қуйи палатаси кўпчилик овоз билан мамлакат ҳукмрон Либерал-демократик партияси (ЛДП) раҳбари Фумио Кисидани Япониянинг 100-бош вазири этиб сайлади. Аввал Кисида ташқи ишлар вазири бўлиб ишлаган.
Японияда бош вазир партиялар кўрсатган номзодлар орасидан сайланади. Бунинг учун номзод кўпчиликнинг овозини қўлга киритиши керак. Ҳар бир партия ўз номзодини кўрсатади. Депутатларнинг ярмидан кўпи ЛДП аъзолари.
Парламентнинг юқори палатасида ҳукмрон ЛДП ҳам кўпчилик овоз олди. Шу билан бирга, сайловда бошқа номзод ғалаба қозонган тақдирда ҳам, қуйи палата тасдиқлаган номзод бош вазир бўлади.
Бугун, 4 октябрь куни Японияда вазирлар «кабинети»нинг янги таркиби эълон қилинади. Вазирликка номзодларни ўтган ҳафта охирида Кисида кўрсатган эди. Ҳукуматнинг 20 аъзосидан 13 нафарини вазирлик лавозмига биринчи марта киришаётган кишилар ташкил этади. Парламент қуйи палатаси ваколат муддати тугаши муносабати билан тарқатиб юборилади. Nikkei агентлиги хабар беришича, Кисида парламент қуйи палатаси учун сайловларни 31 октябрга белгиламоқчи.
Аввалроқ Япония бош вазири Ёсихиде Суга бошчилигидаги ҳукумат тўлиқ таркибда истеъфога чиққан эди. Суга коронавирусга қарши курашга эътибор қаратиш мақсадида, муддати тугагач, Япония бош вазири лавозимига қайта номзодини кўрсатмасликка қарор қилган. «Ҳам коронавирусга қарши чоралар ишлаб чиқиш, ҳам сайлов кампанияси мендан катта энергия талаб қилади. Мен иккаласини бир вақтнинг ўзида олиб боролмайман, шунинг учун биттасини танлашимга тўғри келди», — дея тушунтирди у.
Август ойи бошида бош вазир фаолиятини маъқуллаш бўйича рейтинг энг паст кўрсаткичга (28 фоиз) тушиб кетганди. Бу, хусусан, мамлакатда бўлиб ўтган Олимпия ўйинлари фонида коронавирус дельта штаммининг тез тарқалиши туфайли рўй берди.
Шу билан бирга, Токиодаги Миллий сиёсий тадқиқотлар институти Харуката Такенага NBC News телеканалига маълум қилишича, Олимпия ўйинлари бош вазир лавозимига таъсир қилган бўлса-да, ҳал қилувчи омилга айланмаган.
Изоҳ (0)